قصة شارع سبيرز – الحلقة 30 من برنامج لوين رايحين؟ скачать в хорошем качестве

قصة شارع سبيرز – الحلقة 30 من برنامج لوين رايحين؟

نحنا اليوم موجودين بأحد أهم شوارع العاصمة بيروت. وهوي شارع سبيرز. هالشارع يلي بالأساس كان ولا يزال تابع لحي الرمال أي منطقة الصنائع كان عبارة عن تلال رملية وما كان مسكون ابداً. وضل هالشارع على هل حال لسنين طويلة. متل ما ذكرنا بحلقة سابقة أنو هالمنطقة بلشت تكتسب أهمية كبيرة وقتا قرر السلطان عبد الحميد التاني انو يبني فيها مدرسة كبيرة ليتعلم أولاد المنطقة والمناطق المجاورة الصناعات والمهن والحرف ويلي عرفت بإسم مدرسة الصنائع والتجارة الحميدي. ومع تطور هالمنطقة بلشت الناس تسكنا أكتر وأكتر. فعمرت فيها البيوت وانبنت فيها المحلات التجارية وصار اسمها الصنايع. وضلت هالمنطقة تطور أكتر وأكتر بفترة الانتداب الفرنسي وبفترة الاستقلال فانشقت فيها الطرقات وكترو سكانها ومحلاتا التجارية وصارت مقصد لكل اللبنانيين خصوصاً وانو على مقربة من هالمنطقة كان في الإذاعة اللبنانية والبنك المركزي. ومافينا ننسى مدرسة الصنائع يلي تحول جزء منها للجامعة اللبنانية ويلي صار اليوم المكتبة الوطنية والجزء الآخر استخدم بفترة من الفترات وتحديداً بعد الحرب اللبنانية كمقر لرئاسة مجلس الوزراء ليتحول بعدها لمقر وزراة الداخلية ولا يزال. أما عن سبب تسمية هالشارع بإسم سبيرز فالقصة بتعود للجنرال البريطاني إدوارد سبيرز ويلي تم تعينه عام 1942 كسفير بريطانيا في بيروت وكان يعرف بإسم المفوض الدبلوماسي البريطاني في بيروت. وبفترة الإستقلال لعب الجنرال سبيرز دور اساسي إلى جانب الرئيسين بشارة الخوري ورياض الصلح يلي تم اعتقالن مع رجالات الاستقلال وقتا طالبوا بضرورة استقلال لبنان عن فرنسا. وكان لهالسفير دور اساسي إلى جانب الاستقلالين يلي استطاعو ان يتحرروا من الإنتداب الفرنسي ويحققوا الاستقلال بـ 22 تشرين التاني عام 1943. وبعد ما نال لبنان استقلالو تقرر تكريم السفير البريطاني فأختارت الحكومة اللبنانية هالشارع بالذات يلي ببلش من منطقة الصنايع نزولا لغاية برج المر تقريباً وأطلقوا عليه إسم شارع سبيرز ولليوم اسمو بعدوا ما تغير. إعداد: الدكتور حسان حلاق تقديم: ربيع ياسين تصوير خارجي: سيرج ابي غانم مونتاج: أمير مقصود Facebook:   / rabihy1   Twitter:   / yassinerabih   Instagram:   / rabihyassin