ထရမ့် အရမ်း အားထားတဲ့ သွင်းကုန် အခွန်စည်းကြပ်မှုတွေ ဆိုတာ … | People's Spring скачать в хорошем качестве

ထရမ့် အရမ်း အားထားတဲ့ သွင်းကုန် အခွန်စည်းကြပ်မှုတွေ ဆိုတာ … | People's Spring

ထရမ့် အရမ်း အားထားတဲ့ သွင်းကုန် အခွန်စည်းကြပ်မှုတွေ ဆိုတာ … ဒီကာလ နိုင်ငံတကာရေးရာတွေ ပြောကြဆိုကြတဲ့အခါ မပါမဖြစ်ပါလာပြီး ခြိမ်းသံခြောက်သံလိုတောင်ဖြစ် လာတဲ့ ဝေါဟာရတစ်ခုရှိပါတယ်။ အဲဒါကတော့ tariff ဆိုတဲ့ စကားရပ်ဖြစ်ပါတယ်။ အမေရိကန် သမ္မတ ရာထူးကို ဒေါ်နယ်လ်ထရမ့် ဒုတိယအကြိမ် ဆက်ခံပြီးချိန် ကတည်းက နိုင်ငံတကာ မီဒီယာတွေရဲ့ ခေါင်းစည်း သတင်းတွေမှာ tariff ဆိုတဲ့ဝေါဟာရကို တွင်တွင်သုံးနေကြတာ မြင်ကြရမှာပါ။ tariff ကို ဘာသာပြန် ရရင်တော့ နိုင်ငံတစ်ခုရဲ့ အစိုးရက တခြားနိုင်ငံတွေဆီကနေ တင်သွင်းလာတဲ့ ကုန်စည်တွေအပေါ် အခွန်စည်းကြပ် ကောက်ယူမှုကို ရည်ညွှန်းတာ ဖြစ်ပြီး သွင်းကုန် အခွန်စည်းကြပ်ခြင်းလို့ ပြန်ဆိုရမှာဖြစ်ပါတယ်။ အမေရိကန်က tariff ကို ဘာလို့ကျယ်လောင်ပြောလာသလဲ၊ ကုန်သွယ်စစ်ပွဲအထိဘာကြောင့် ခန့်မှန်းပြောဆိုလာကြသလဲ၊ ဘယ်လိုသက်ရောက်မှုတွေရှိလာနိုင်ပါသလဲ။ သွင်းကုန် အခွန်စည်ကြပ်မှုတွေ မြှင့်တင်ရေး ဆိုတာဟာ ထရမ့်ရဲ့ သမ္မတသက်တမ်း နှစ်ကြိမ်စလုံးမှာ အရေးပါတဲ့ စီးပွားရေးနဲ့ နိုင်ငံရေး မူဝါဒ တစ်ခုဖြစ်ပြီး လက်ရှိ ဒုတိယ သက်တမ်းမှာတော့ ပိုပြီး ကြမ်းတမ်းလာတယ်လို့ ဆိုနိုင်ပါတယ်။ အစဉ်အလာအရ အမေရိကန်ဟာ ပြည်ပနိုင်ငံတွေဆီက သွင်းကုန်တွေအပေါ် အခွန်စည်းကြပ်မှုကို လျှော့ပေါ့ပေးလေ့ ရှိခဲ့ပါတယ်။ အကျိုးဆက်အဖြစ် အမေရိကန်ရဲ့ ကုန်ထုတ် စီးပွားရေး လုပ်ငန်းတွေကို နစ်နာ ထိခိုက်စေတယ်လို့ ထရမ့်က ထောက်ပြ ဝေဖန်ခဲ့ပါတယ်။ နိုင်ငံခြားကနေ စျေးပေါတဲ့ ကုန်စည်တွေ ဝင်ရောက်နေတဲ့အခါ အဲဒီကုန်စည်တွေကို တင်သွင်းတဲ့ နိုင်ငံရဲ့ တူညီတဲ့ ပြည်တွင်း ထုတ်ကုန်တွေအပေါ် ဝယ်လိုအား ကျဆင်းသွားပါတယ်။ အဲဒီတော့ ပြည်တွင်းက ကုန်ထုတ် လုပ်ငန်းတွေ အရှုံးပေါ်ပြီး လုပ်ငန်း ရပ်စဲတာ၊ ပြည်တွင်း အလုပ်သမားတွေ အလုပ်အကိုင် ဆုံးရှုံးတာတွေ ကြုံလာရတတ်ပါတယ်။ ဒီလို အခြေအနေမျိုးတွေကို တုံ့ပြန်ဖို့အတွက် သက်ဆိုင်ရာ နိုင်ငံ အစိုးရဟာ သွင်းကုန် အခွန် စည်းကြပ်မှုတွေကို မြှင့်တင်တတ်ကြပါတယ်။ အခွန်မြှင့်တင်တာ ခံလိုက်ရတဲ့ သွင်းကုန်တွေဟာ စျေးတင်ရောင်းချရပြီး ပြည်တွင်း ထုတ်ကုန်တွေနဲ့ တန်ဖိုး မကွာတော့ပါဘူး။ အဲဒီအခါ နိုင်ငံရဲ့ ကုန်ထုတ်စွမ်းအားရော၊ ထုတ်ကုန်တွေရဲ့ ရောင်းအားပါ ပြန်မြင့်တက်လာစေနိုင်ပါတယ်။ အဓိက ပြဿနာ တစ်ခုကတော့ အခွန်တိုး ခံရတဲ့အခါ ကုန်စည် တင်သွင်းသူတွေက စျေးကွက်ထဲ ဖြန့်ချိတဲ့ စျေးနှုန်းကို မြှင့်လိုက်တာကြောင့် ပြည်တွင်း ဝယ်ယူ သုံးစွဲသူတွေက စျေးပိုပေးရ၊ ငွေပိုသုံးရခြင်းပါပဲ။ ထရမ့်ဟာ သူ့ရဲ့ ပထမ သမ္မတ သက်တမ်းတုန်းက တရုတ်ကို အဓိက ပစ်မှတ်ထားပြီး သွင်းကုန် အခွန်စည်းကြပ်မှုတွေကို မြှင့်တင်ခဲ့ပါတယ်။ တရုတ်ကလည်း အားကျမခံ အမေရိကန် သွင်းကုန်တွေကို အခွန်တွေ ပြန်တိုးကောက်ရာက ဘတစ်ပြန် ကျားတစ်ပြန်တွေ ဖြစ်ပြီး အဲဒီ အခြေအနေကို မီဒီယာတွေက ကုန်သွယ်ရေး စစ်ပွဲလို့တောင် တင်စားခဲ့ပါတယ်။ ထရမ့်ရဲ့ ဒုတိယ သက်တမ်းမှာတော့ သူဆင်နွှဲနေတဲ့ ကုန်သွယ်ရေး စစ်ပွဲရဲ့ ပစ်မှတ်ဟာ တရုတ်တင် မကတော့ဘဲ မဟာမိတ်တွေ၊ အိမ်နီးချင်း နိုင်ငံတွေ အပါအဝင် တစ်ကမ္ဘာလုံးကို ဖြန့်ကျက်လာပါတော့တယ်။ ထရမ့်ဟာ အမေရိကန်ဆီ တင်သွင်းတဲ့ အလျူမီနီယမ်နဲ့ သံမဏိတွေအတွက် အခွန် ၂၅ ရာခိုင်နှုန်း စည်းကြပ်မှုကို မတ်လလယ်မှာ အစပြုကျင့်သုံးခဲ့တယ်။ တရုတ်၊ ကနေဒါနဲ့ မက္ကဆီကို နိုင်ငံတွေဟာ အမေရိကန်ဆီ မူးယစ်ဆေးဝါး မှောင်ခို တင်သွင်းမှုတွေကို တားဆီးဖို့ ထိထိရောက်ရောက် အားမထုတ်ဘူးဆိုတဲ့ အကြောင်းပြချက်နဲ့ အစောပိုင်း ကတည်းကလည်း အဲဒီ သုံးနိုင်ငံရဲ့ သွင်းကုန် တချို့အပေါ် အမေရိကန်က အခွန်စည်းကြပ်မှုတွေ မြှင့်တင်ထားပါသေးတယ်။ အဲဒီနိုင်ငံတွေကလည်း အမေရိကန်ရဲ့ သွင်းကုန်တွေအပေါ် လက်တုံ့ပြန်ပြီး အခွန်စည်းကြပ်မှုတွေ တိုးမြှင့်ထားပါတယ်။ သွင်းကုန်တွေအပေါ် အခွန်တိုးမြှင့် စည်းကြပ်ရာမှာ ကုန်စည်တန်ဖိုးရဲ့ ရာခိုင်နှုန်းတွေနဲ့ သတ်မှတ်လေ့ ရှိပါတယ်။ ဥပမာ တရုတ်ရဲ့ သွင်းကုန် တစ်မျိုးကို သွင်းကုန်အခွန် ၂၀ ရာခိုင်နှုန်း စည်းကြပ်တယ် ဆိုတဲ့ အဓိပ္ပါယ်ဟာ အဲဒီ ကုန်စည်က ၁၀ ဒေါ်လာ တန်ဖိုးရှိရင် အစိုးရက ၂ ဒေါ်လာ အခွန်ကောက်တဲ့ သဘောပါ။ အဲဒီ အခွန်ကိုတော့ သွင်းကုန် တင်သွင်းလာတဲ့ ကုမ္ပဏီတွေက ပေးဆောင်ရပါတယ်။ အဲဒီ ကုမ္ပဏီတွေလည်း ပိုလျှံလာတဲ့ အခွန်စရိတ် အားလုံး၊ ဒါမှမဟုတ် အစိတ်အပိုင်း တစ်ခုစာလောက် ဝယ်ယူသုံးစွဲသူတွေဆီက ပြန်ရဖို့ ပစ္စည်းတွေကို စျေးတင်ပြီး ရောင်းပါတယ်။ ထရမ့် အစိုးရ လက်ထက် နိုင်ငံခြားရေး မူဝါဒတွေအရ အမေရိကန်ဟာ အစဉ်အလာ မဟာမိတ် ဥရောပ သမဂ္ဂ(EU)နဲ့ ဆက်ဆံရေး ခါးသီး စိမ်းကားလာနေရာကနေ EU ရဲ့ သံမဏိနဲ့ အလျူမီနီယမ်တွေကိုပါ သွင်းကုန်အခွန် တိုးကောက်မယ့် ထရမ့်ရဲ့ ဆုံးဖြတ်ချက်ကြောင့် နှစ်ဖက်ကြား ပိုပြီး တင်းမာလာမယ့် အနေအထား ရှိနေတယ်။ ထရမ့်ကို တုံ့ပြန်တဲ့ အနေနဲ့ အမေရိကန် ဝီစကီတွေကို အခွန် ၅၀ ရာခိုင်နှုန်းထိ တိုးကောက်ဖို့ စဉ်းစားနေကြောင်း EU က ပြောခဲ့ပြီး ထရမ့်ကလည်း အဲဒီလိုသာ လုပ်မယ်ဆိုရင် EU နိုင်ငံတွေဆီကနေ အမေရိကန်ကို တင်သွင်းသမျှ အရက်အားလုံးကို သွင်းကုန် အခွန် ၂၀၀ ရာခိုင်နှုန်း စည်းကြပ်မယ်လို့ ခြိမ်းခြောက်ခဲ့ပါတယ်။ တစ်နည်းအားဖြင့် အမေရိကန်ကို ဒေါ်လာ ၁၀၀ နဲ့ တင်သွင်းတဲ့ ဝိုင်တစ်လုံးအတွက် ဒေါ်လာ ၂၀၀ အခွန်ဆောင်ခိုင်းမယ့် သဘောပါ။ ထရမ့်သာ အဲဒီကိစ္စကို တကယ် ထလုပ်မယ်ဆိုရင် ဥရောပ အရက်စျေးကွက် တစ်ခုလုံး ဖရိုဖရဲ ဖြစ်သွားပါလိမ့်မယ်။ အမေရိကန်ရဲ့ နောက်ထပ် မဟာမိတ် နိုင်ငံတစ်ခုဖြစ်တဲ့ တောင်ကိုရီးယား အစိုးရက သွင်းကုန် အခွန် စည်းကြပ်မှုတွေကနေ ကင်းလွတ်ခွင့်ပေးဖို့ ထရမ့်ဆီ မေတ္တာ ရပ်ခံခဲ့ပေမယ့် ထရမ့်ကိုယ်တိုင်ကတော့ သူ့ရဲ့ မူဝါဒတွေမှာ အခွင့်ထူးခံ ကင်းလွတ်တဲ့ နိုင်ငံရယ်လို့ ရှိမှာ မဟုတ်ကြောင်း ပြောထားပါတယ်။ ပြီးတော့ သွင်းကုန်အခွန် တိုးမြှင့်မှုတွေကလည်း လှိုင်းလုံးတွေလို တစ်ခုပြီးတစ်ခု ထပ်ပေါ်ထွက်လာနိုင်ခြေ ရှိနေဆဲပါ။ #ludunwayoo #လူထုနွေဦး #NewsUpdate 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 𝗬𝗼𝘂𝗧𝘂𝗯𝗲 -    / @peoplespring   𝗙𝗮𝗰𝗲𝗯𝗼𝗼𝗸 -   / ludunwayoo   𝗪𝗲𝗯𝘀𝗶𝘁𝗲 - https://www.ludunwayoo.com/ 𝗜𝗻𝘀𝘁𝗮𝗴𝗿𝗮𝗺 -   / ludunwayoo   𝗧𝗲𝗹𝗲𝗴𝗿𝗮𝗺 - https://t.me/peoplespring