ජනතා විමුක්ති පෙරමුණ යනු කුමක්ද? скачать в хорошем качестве

ජනතා විමුක්ති පෙරමුණ යනු කුමක්ද?

ජනතා විමුක්ති පෙරමුණ යනු කුමක්ද? සමහරවිට අද දවසේ සමාජීය අර්ථයෙන් වඩාත් වැදගත්ම ප්‍රශ්නය වන්නේ මෙය විය හැකිය. පොදුවේ ගත්විට, බලාපොරොත්තු වියහැකි ලෙසම, මෙම ප්‍රශ්නයට පිළිතුරු වශයෙන් දක්නට ලැබෙන්නේ අපේ දේශපාලන පක්ෂපාතීත්වයන් අනුව දෙපැත්තට බෙදී සිදුකරන අවිචාරමත් මත දැක්වීමක් පමණි. අද වයස තිස් ගණන් වන, මැදි වියට ආසන්නව සිටින, වැඩිහිටි තරුණයන් යනු ජවිපෙ දෙවැනි සන්නද්ධ නැගී සිටීම අවසන් වූ පසු ඉපදුනු පරම්පරාවයි. ඔවුන්ගේ ඉතිහාසය පටන් ගන්නේ '1989' නම් - ලාංකික මෙන්ම ගෝලීය දෝංකාරයන්ගෙන් සමන්විත - ව්‍යාකූල සිදුවීමෙන් පසුවයි. කෞශල්‍ය කුමාරසිංහ ගේ වචන වලට අනුව අපට මේ තිබෙන්නේ 'නිම්නලා ගේ ඉතිහාසය' කියා කිව හැකිය.  ජනතා විමුක්ති පෙරමුණට එරෙහිව කරන මඩ ගැසීම් මෙන්ම ජනතා විමුක්ති පෙරමුණ නම් ශරීරයේ වසන මැස්සන්ට පහර දීමට කඩුව ලෙලවන ආරක්ෂකයන් ගෙන් ද දුරස්ව ජනතා විමුක්ති පෙරමුණේ ඉතිහාසය විමසා බැලීම අද දවසේ අත්‍යවශ්‍ය වන්නේ මෙම නිසාය. හදිසියේ අප ඉදිරියේ ප්‍රායෝගික විකල්පයක් ලෙස තිබෙන මෙම දැවැන්ත දේශපාලන ව්‍යාපාරයේ ප්‍රභවය, විකාශය සහ අභ්‍යන්තර ගතිකත්වයන් මොනවාද? එමගින් අපට එම ව්‍යාපාරය සහ එහි වියහැකි අනාගතය සම්බන්ධයෙන් කිව හැක්කේ කුමක්ද? මෙවැනි ප්‍රශ්න වලට පිළිතුරු දීම සඳහා උපකාර කරගත හැකි තරමක විශාල ශාස්ත්‍රීය සාහිත්‍යයක් තිබේ. අවාසනාවට මේවා තිබෙන්නේ අපේ රටේ ජනප්‍රිය දේශපාලන සංවාදයෙන් ඔබ්බෙහිය. මෙම සාහිත්‍යය මත පදනම් වූ සංවාදයක් දිග හැරීමට අප උත්සාහ කරන්නේ මෙම නිසාය. නිර්මාල් සමග අපේ රටේ මෑත කාලීන දේශපාලනයේ ඉතිහාසය සම්බන්ධයෙන් සංවාද මාලාවක් කළ යුතුය කියා තීරණය කළේ මේ වෙනුවෙනි. ජනතා විමුක්ති පෙරමුණ යනු නිර්මාල් ගේ බුද්ධිමය ජීවිතයේ අකණ්ඩව පරීක්ෂාවට බඳුන් කර ඇති අධ්‍යයන වස්තුවයි. එම අදහස් සමග ද විචාරාත්මක ලෙස අභිමුඛ වීමට ඉදිරි කාලයේ දී අපි උත්සාහ කරමු.    1983 ජවිපෙ තහනම් කිරීම සිය දේශපාලන ජීවිතයේ අත්වැරැද්දක් බව ජේ. ආර්. ජයවර්ධන 80 දශකයේ අවසානයේ දී පිළිගත්තේ ය. අපේ රටේ වර්තමාන පාලකයා වන ජේ. ආර්. ගේ ඥාතී පුත්‍රයා අද නැවතත් ජනතා විමුක්ති පෙරමුණේ ප්‍රජාතන්ත්‍රවාදී ක්‍රියාකාරිත්වය නිල නීතියට අනුව අවහිර කරමින් සිටියි. අවසානයේ දී ඔහුට කුමක් කියන්න සිදුවන්නේ ද කියා අප තවම දන්නේ නැත. අපට නිශ්චිතව කිව හැකි එකම දේ වන්නේ ජනතා විමුක්ති පෙරමුණේ මෙම වර්ධනයට පක්ෂපාතී වෙමින් එය සුභවාදීව දකින පිරිසක් අතින් එහි ඉතිහාසය විචාරාත්මක ලෙස සාකච්ඡා කිරීම අපේ රටේ පොදු අනාගතයට යහපත් විය හැකි බවයි. මේ තිබෙන්නේ එවැනි අරමුණක් සහිතව සිදු කරමින් තිබෙන වැඩක කොටසකි