Bradford-ah Bonhoeffer-a Sulhnu Chhuiin (28 October 2023) скачать в хорошем качестве

Bradford-ah Bonhoeffer-a Sulhnu Chhuiin (28 October 2023)

Bradford-ah Bonhoeffer-a Sulhnu Chhuiin (28 October 2023, Inrinni) Manchester hmar lama Bradford khawpui hi England hmar lama ‘Asian khawpui’ tih theih hial tur a ni a. A khawpui mihring zat za-a sawmhnih pahnih (22%) vel hi Asian mite niin England rama Asian mite chen tamna ber Leicester khawpui dawttu a ni. Leicester-ah chuan a khawpuia mi cheng zat za-a sawmhnih pakua (29%) chuang zet chu Asian mite an ni thung. Kum 90 zet kal ta, kum 1933 November ni 27-ah khan German pastor leh theologian hmingthang Dietrich Bonhoeffer-an Bradford khawpui hi a rawn tlawh a. Ama hovin German rawngbawltu dangte nen thuchhuah pawimawh tak Bradford Declaration tia hriat hlawh zui ta chu an siam nghe nghe a. Chu thuchhuah-ah chuan Hitlera Nazi sorkar-in kohhran atanga Juda pastor leh Kristiante hnawhchhuahna dan an siam dodalna thu sawi chhuakin Nazi sorkar a dodalna chu thup hauh lovin a lantir ta a ni. Hetih lai hian Bonhoeffer-a chu kum 27 mi lek a la ni a. Ram pawna a him china rawngbawl daih reng mai chu Bonhoeffer-a chuan dikin a hre thei ngang lo va. German ramah lo kir lehin Hitlera hleih nei rorelna chu kawng chi hrang hrangin a theih tawpin a do va. A tawpah phei chuan Hitlera thah tuma phiarruknaah hial a inhnamhnawih tih hriat chhuah a nih avangin kum 39 mi lek a nih lai, kum 1945 April ni 9-ah Flossenburg-ah khaihlum a ni ta a ni. Bonhoeffer-an Bradford khawpui a tlawh leh Bradford Declaration chhuah a nih kum 90-na pualin vawiin programme hi siam a ni a. Tlai dar 3:30-ah Bradford Cathedral-ah Bonhoeffer-a hla phuah hrang hrang zaipawlin remin inkhawm hun tan a ni a. Inkhawm banah “Faith and Politics” tih thupui hmangin mi pathumin darkar chanve theuh thu an sawi a. Thusawitute chu German ram atanga lo kal, German pastor leh theologian Dr Matthias Rein; The Rt Revd Nick Baines, Bishop of Leeds leh Revd Dr. Noel Irwin, Luther King Centre te an ni. German tawngin Bonhoeffer-a hla phuah kan sa a, Dr. Rein-a hian German tawngin thu a sawi a, German tawngin malsawmnain min tin bawk a ni. Bonhoeffer-a khan Bradford hi vawi khat chauh a tlawh a, mahse kum 90 hnuah pawh Bradford khawpui hian a la theihnghilh lo chu a nih hi. Bradford khawpuia Bonhoeffer-a sulhnu chhuia hun kan hman lai chuan kan ram Myanmar ngeiah pawh ‘Bonhoeffer-a tam tak’-in rorelna dik lo dova nun an hlan tawh dan leh an la hlan mek dante ka ngaihtuahnaah a lo lut zut zut a. Ka supervisor nen kan titi-naah pawh ka sawi chhuak nghe nghe. Bonhoeffer-an vawi khat chauh Bradford a lo tlawh avang khan kum 90 hnuah keiin Bradford ka tlawh ve phah a. He khawvelah hian vawi khat chauh kan piangin kan lo zin zuai a ni a. Kan vawi khat zin hian eng ang rah nge a chhuah ve ang a, eng chen chiah nge hriat reng a nih ve ang tih te ngaihtuah zel chungin Bradford khawpui chu zan dar 7:05 relin ka chhuahsan leh ta a ni.