【180度環迴激吻】今晚起不設防 陳少邦話想同老婆生孖B - A скачать в хорошем качестве

【180度環迴激吻】今晚起不設防 陳少邦話想同老婆生孖B - A

前無綫藝人陳少邦今年六月同澳門廣播電視主持鄭加盈（Rain）註冊結婚，今日喺香港嘅帝樂文娜公館酒店補擺婚宴。一對新人於晚上7時許接受記者訪問，佢哋仲應記者要求，180度咁環迴咀嘴，之後新娘子仲幫老公抹去唇印。之後就同一班兄弟姊妹合照，兄弟包括楊明、李天翔、蔡淇俊、黃嘉樂、李霖恩等，鄭世豪就撐住枴杖咁做伴郎，仲請埋喬寶寶擔任婚宴嘅司儀。 陳少邦接受記者訪問時坦言好開心，但都好擔心會有甩漏。問到係咪開始咗造人計劃？阿邦話：「下年或者後年先啦，今年趕唔切，不過今晚起就會不設防，但係今晚我都會不醉冇歸，因為我得罪人多嘛！(兄弟唔會幫你頂酒咩？)佢哋仲快過我醉呀，佢哋9點前，我就9點後啦。」至於會生幾多個小朋友，鄭加盈就話要順其自然，但新郎哥就插嘴話一個都ok，不過佢就話都聽人講話生龍鳳胎或者孖胎。記者追問佢哋家族史有冇生過孖胎？鄭家盈答：「我爸爸係龍鳳胎，希望我都遺傳到少少啦！」阿邦就話自己屋企四兄弟，咁問佢係咪想生女，佢話：「都冇所謂，都會睇老婆意思，但老婆就話生女就唔好似我喇！怕日後麻煩。」 今日一對新人就冇接新娘儀式，阿邦就解釋自己唔鍾意玩，亦想俾啲兄弟舒服啲，不過就安排咗一個嚇新娘環節，兄弟們爆門硬搶新娘，事前冇同老婆講過。身旁嘅鄭加盈都話俾佢哋嚇親。記者笑佢慳番啲開門利是？阿邦就話：「梗係，呢啲係俾老婆使o架嘛！啲姊妹都冇投訴！」 阿邦仲透露，將於12月17日返澳門嘅旅遊塔擺酒，講到度蜜月，阿邦話6月註完冊，已經同老婆去咗台灣，因為老婆好鍾意台灣，當咗係佢家鄉咁。鄭加盈就補充話自己都好想睇北極光，所以12月會同啲姊妹去睇。問點解唔同老公去？阿邦就話自己要返工。 講到愛的宣言，鄭加盈就大讚老公好孝順，而阿邦就大讚老婆好靚，佢話：「做呢行嘅人都知，另一半會好慘，要承受嘅嘢會多過我，但佢對我就好關懷、好體貼，又冇俾壓力我，令到我可以實現自己嘅夢想，亦都好鼓勵我囉！」跟住阿邦仲當住記者面前，講咗十次「好愛好愛」佢老婆喎，笑言俾林峯多咗兩次。問到港澳兩邊搞婚宴，會唔會用咗好多錢？阿邦話：「都唔係好多！」鄭加盈補充話，6位數一定有囉，但都係想做好件事，令到父母開心。