أول اطلالة إعلامية لي⭐️ حوار عفوي، ارتباك جميل، و حديث يخرج بكل تلقائية كما نشعر به لا كما نخطط له. скачать в хорошем качестве

أول اطلالة إعلامية لي⭐️ حوار عفوي، ارتباك جميل، و حديث يخرج بكل تلقائية كما نشعر به لا كما نخطط له.

📅 التاريخ: 12 / 11 / 2025 📍 المكان: راديو كارمن 🎙 البرنامج : كارمن أدب 🎧 الإعلامي ياسين بوزلفة 🎬 إخراج : سلمان السعداوي أوّل ظهور إعلامي لي مع الإعلامي المتألّق ياسين بوزلفة. لقاء صعيب بما إنّو أوّل حوار صحفي نعملو… الرهبة والخوف أثّروا برشة على إجاباتي اللي كانت سطحيّة شوية ومرتبكة. أمّا الأجمل إنّو اللقاء كسّر حاجز الخوف من الأضواء ومن الإعلام. و هذا ملخص ما جاء في الحوار : 🔶️ السؤال : عرفينا بروحك، اشكون نجوى بن علي ؟ 🎙 الجواب : نجوى بن علي، فنانة أوّلًا، وشاعرة ثانيًا. نحاول نثبت وجودي بأعمال تشبّهلي، بانتاجات تعبر عليّا . مازلت في أوّل الطريق، والبداية متاعي ما تفوتش الخمسة سنين. والخمسة لا يساوي في حساب الزمن شيء… مدّة ما تكفّيش... 🔶️ السؤال : لقب بن علي هو لقبك الحقيقي؟ وتنتمّي للعائلة المالكة سابقًا؟ 🎙 الجواب : لا، ما ننتميش للعائلة المالكة سابقًا. علي هو اسم بابا، ومنّو خذيت اسمي الفني. الناس تعرفني في الساحة باسم نجوى بن علي، أمّا لقبي العائلي الصحيح هو السايبي 🔶️ المقرّبين منك يقولولّي إنّك حسّاسة برشا وانفعالية، صحيح؟ 🎙 إي نعم، أنا حسّاسة برشا، وهاذي طبيعة ما هيش اختيار. مهما تحاول تنقص منها، ما تنجّمش، على خاطر الطبع يبقى طبع… واللي بالطبيعة ما يتغيّرش. 🔶️ إنتِ تغنّي، تكتب وتلحّن. حدّثينا شوية على هالتجارب: عندِك استعداد تاخو كلمات ولا ألحان من غيرِك؟ تفكّر يوم تبيع ألحانِك؟ 🎙مانيش أنا اللي اخترت نكون فنّانة… هو الفنّ اللي اختارني. حاجة تولدت معايا، تجري في دمي، جبدني ليه بقوّة، وانا مشيت معاه بمحبة كبيرة برشا، وكأنّو هو الطريق اللي كان يستنّاني من اللّول. ما فما حتى مانع يمنع الفنان إنّو يكتب نصوصو ويلحّنها… هذا جزء من الهوية الفنية متاعي. المثل يقول ( ما تجوز الصدقة إلا ما تكفي مالي الدار ) توا أنا في مرحلة بناء… ونصوصي وألحاني أولى بيا. البيع موش مرفوض، أمّا موش أولوية في الظرف الحالي. التلحين ما قريتوش في الجامعات. التلحين قبل كل شيء موهبة ، تتطور - بالاطلاع و الدراسة، أما أصلها موهبة... موش شهادة. 🔶️ سمّي ثلاثة شعراء. تعتبريهم أسماء كبيرة في الساحة 🎙 محمد الغزال الكثيري، عبد الحميد بريك، وسوف عبيد… أسماء نحترمها ونعتزّ بيها. 🔶️ سمّي ثلاثة شعراء كتاباتهم رديئة. 🎙 لا… وما نسمّيش. تربّينا إنّو النصيحة تكون في السرّ موش في العلن. ثمّة نقّاد مختصّين هم أقدر يحكموا. وأنا ما زلت في بداية الطريق… وما نيش مخوّلة نحكم على غيري. 🔶️ فما منشورات في صفحتك توحي بالغرور والنرجسية. 🎙 موش غرور… هذا فخر واعتزاز بالنفس. 🔶️ فما منشورات بسيطة ما فيها حتى علاقة بالشعر؟ 🎙 الخاطرة كتابة… والشعر كتابة. النص اللي حكيت عليه خاطرة، موش شعر. وما فما حتى مشكل إنّو الشاعر يكتب الخواطر والنصوص القصيرة… التنويع ثراء موش نقص. 🔶️ كتاباتك فيها برشة روحانيات، ويقولوا إنك قريبة من الفكر الشيعي…؟ 🎙 هذا كلام ما قاله حتى حد. إنت بنيت على منشورات كتبتها وقت الضربة الإيرانية على إسرائيل. أنا سنيّة وما عندي حتى علاقة بالفكر الشيعي… أمّا إي نعم: فخورة بالضربة الإيرانية، وتمنّيت العرب يكونوا مبادرين قبل غيرهم. 🔶️ تكتب على فلسطين… هل كتاباتك أفادت الفلسطينيين؟ غيّرت الواقع؟ 🎙 أنا نكتب خاطر نعيش ونحسّ. الكتابة صوت… موقف… وجدان. التأثير الحقيقي للشعر يكون في الوعي وفي الذاكرة… وهذاك هو دوري. 🔶️ شنوّة الفرق بين الشعر العمودي، والحرّ، والنثر؟ 🎙 الشعر الحرّ راهو موزون، أمّا ما يخضعش لنفس القواعد متاع الشعر العمودي… ما فيهش نظام الشطرين، لا قافية، لا رويّ. الشعر الحرّ متحرّر من القيود هاذي الكلّ، يعطيك مساحة أوسع للتعبير. 🔶️ ومهرجان دوز للشعر الغنائي؟ 🎙 مهرجان دوز من أهم المحطات في بداياتي. الاستقبال كان ممتاز… الحفاوة كبيرة… وحضرت دورتي سنة 22 و سنة 23. في دورة سنة 24 ما حضرتش لأسباب شخصية. ودورة هذه السنة 25 ما زالت ما خرجتش للعلن. المسابقة ما تعملتش في الدورات اللي حضرتهم بسبب نقص الدعم، وتمّ تعويضها بقراءات شعرية بمنحة 300 دينار. ورغم هذا… التجربة مهمّة ومحترمة. 🔶️ الشعر يوكّل الخبز في تونس ؟ 🎙 في تونس الثقافة بصفة عامة، والشعر بصفة خاصة، ما يعيّشش وما يوكّلش الخبز. قلة قليلة من الشعراء والفنانين عايشين من الثقافة… وهما أسماء كبيرة وناشطة عربياً وعالمياً. 🔶️ رأيك في من يدفع المال مقابل الحضور في الملتقيات ؟ 🎙 لا أرى نفسي معنيّة بدفع مقابل مالي للحضور في تظاهرة أو ملتقى؛ فهذا خيار نابع من قناعة شخصية ألتزم بها وأحافظ عليها 🔶️ كلمة الختام: 🎙نحب نشكر كلّ إنسان وقف معايا… بالكلمة، بالنصيحة، ولا بالفرصة. ونقولهم: انتم النبض اللي يعطيني القوة باش نواصل… والطريق ما يتبنى كان بالناس الصادقة. #أعلام #راديو_كارمن #كارمن_أدب #شعر #فن الاعلام_التونسي