ആലുവ മണപ്പുറം ശിവരാത്രി Aluva Mahadeva Temle Sivarathri 2026 скачать в хорошем качестве

ആലുവ മണപ്പുറം ശിവരാത്രി Aluva Mahadeva Temle Sivarathri 2026

ശിവരാത്രിക്ക് വളരെ പ്രാധാന്യവും പ്രചാരവുമുള്ള ആലുവ മഹാദേവക്ഷേത്രത്തിന്റെ വിശേഷങ്ങളും ശിവരാത്രിയുടെ മാഹാത്മ്യവും ശരിയായ രീതിയിൽ വ്രതമെടുക്കേണ്ട വിധവും ആലുവ മണപ്പുറത്തു ബലിയിടാൻ എത്തുന്നവർക്ക് വേണ്ട മാർഗ്ഗ നിർദ്ദേശ്ശങ്ങളുമെല്ലാമാണ് ഈ വീഡിയോയുടെ ഉള്ളടക്കം. എറണാകുളം ജില്ലയിൽ പെരിയാറിന്റെ തീരത്താണ് ആലുവ മഹാദേവക്ഷേത്രം. പെരിയാർ ഇവിടെയെത്തുമ്പോൾ രണ്ടായി പിരിഞ്ഞു ക്ഷേത്രത്തിന്റെ ഇരുവശങ്ങളിലൂടെയുമൊഴുകി അറബിക്കടലിൽ ചെന്ന് ചേരുന്നു. ഒരു കൈവഴി മംഗലപ്പുഴയെന്നും ഈ ഭൂഭാഗം ത്രിവേണീ സംഗമം എന്നും അറിയപ്പെടുന്നു. നദിയുടെ തീരത്തെ വിശാലമായ മണൽ പരപ്പിൽ സ്വയംഭൂ ശിവലിംഗത്തോട് കൂടിയ ക്ഷേത്രം മൈതാനത്തിന്റെ ഏകദേശം മധ്യ ഭാഗത്തായി സ്ഥിതി ചെയ്യുന്നു. ശ്രീരാമനും ജടായുവുമായി ബന്ധപ്പെട്ടും മറ്റൊരു ഐതിഹ്യവുമുണ്ട്. രാവണൻ സീതാദേവിയെ ലങ്കയിലേക്ക് തട്ടികൊണ്ട് പോകവെ ഈ പ്രദേശത്തു വച്ച് രാമഭക്തനായ ജടായു രാവണനെ തടുക്കുകയും തുടർന്നുളള യുദ്ധത്തിൽ രാവണൻ ജടായുവിനെ മൃതശരീരനാക്കുകയും ചെയ്തു. ജടായുവിന്റെ തലയും വായും വീണ സ്ഥലം ആലുവായും നടുഭാഗം വീണതു നടുങ്ങല്ലൂരും, വാലിന്റെ ഭാഗം വീണ സ്ഥലം തിരുവാല്ലൂരും എന്നാണ് കഥ. നടുങ്ങല്ലൂർ പിൽകാലത് കടുങ്ങല്ലൂർ ആയി മാറി. ആലുവ മഹാദേവക്ഷേത്രം, കടുങ്ങല്ലൂർ നരസിംഹസ്വാമീ ക്ഷേത്രം, തിരുവാലൂർ മഹാദേവ ക്ഷേത്രം എന്നിവ ഇങ്ങനെ ഉണ്ടായവയാണ് എന്നൊരു കഥയും പ്രചാരത്തിലുണ്ട്. രാവണന്റെ വെട്ടേറ്റ് വീണ ജടായു, ശ്രീരാമനെ കണ്ട് വിവരങ്ങൾ ധരിപ്പിച്ചതിനു ശേഷം മരിക്കുകയും ആ പക്ഷി ശ്രേഷ്ഠന്റെ മരണാനന്തര ക്രീയകൾ പൂർണ്ണാനദി ആയ പെരിയാർ തീരത്ത് ആലുവ മണപ്പുറത്തു ശ്രീരാമൻ ചെയ്തു എന്ന സങ്കല്പത്താൽ ഇവിടെ പിതൃക്കൾക്ക് ബലിയർപ്പിക്കുന്നത് വളരെ പ്രാധാന്യമുള്ളതായി കരുതപ്പെടുന്നു. എല്ലാ ദിവസവും തന്നെ നൂറുകണക്കിന് ആളുകളാണ് ബലിയിടുന്നതിനായി ഇവിടെത്തുന്നത്. എല്ലാ മാസത്തിലെയും കറുത്ത വാവിനു ഇവിടെ ബലിയിടാൻ പ്രാധാന്യം ഉണ്ടെങ്കിലും കർക്കിടകവാവ്, തുലാവാവ്, ശിവരാത്രി വാവ് മുതലായ നാളുകളിലാണ്‌ പിത്യ കർമ്മങ്ങൾക്ക് പ്രധാന്യം കൂടുതൽ. മീനമാസത്തിൽ തിരുവാതിര കൊടിയേറ്റായി ഉത്രം വിളക്കോടുകൂടി സമാപിക്കുന്ന തരത്തിലാണ് ആലുവ മഹാദേവ ക്ഷേത്രത്തിൽ ഉത്സവം ആഘോഷിക്കുന്നത്. ശിവരാത്രിയുടെ കഥയും വ്രതമെടുക്കേണ്ടതെങ്ങനെ എന്നും ചുരുക്കി പറഞ്ഞതിന് ശേഷം, ആലുവയിലെ ശിവരാത്രിയുടെ വിശേഷങ്ങളിലേക്ക് കടക്കാം. പാലാഴി മഥനം നടത്തിയപ്പോൾ പുറത്തുവന്ന കാളകൂടവിഷം ലോക രക്ഷാർഥം ശ്രീ പരമേശ്വരൻ പാനം ചെയ്തു. ഈ വിഷം ഉളളിൽച്ചെന്ന് ഭഗവാന് ഹാനികരമാവാതിരിക്കാൻ പാർവതീദേവി അദ്ദേഹത്തിന്റെ കഴുത്തിൽ മുറുക്കിപ്പിടിക്കുകയും, വായിൽ നിന്നു പുറത്തു പോവാതിരിക്കാൻ ഭഗവാൻ വിഷ്ണു വായ പൊത്തിപ്പിടിക്കുകയും ചെയ്തു. അങ്ങനെ വിഷം കണ്ഠത്തിൽ ഉറയ്ക്കുകയും ഭഗവാന് നീലകണ്ഠൻ എന്ന പേര് ലഭിക്കുകയും ചെയ്തു. തുടർന്ന് ഭഗവാന് ആപത്തൊന്നും വരാതെ പാർവതീദേവി ഉറക്കമിളച്ചിരുന്നു പ്രാർഥിച്ച ദിവസമാണ് ശിവരാത്രി. ഭൂതഗണങ്ങളും സകല ദേവീദേവന്മാരും അന്നേ ദിവസം ഉറക്കമൊഴിച്ച് ശിവനെ ഭജിച്ചു കഴിഞ്ഞു എന്നാണ് വിശ്വാസം. ശിവരാത്രിയുടെ തലേ ദിവസം ഒരിയ്ക്കലോടെ വ്രതം ആരംഭിക്കാം. അതായതു തലേന്ന് വൈകുന്നേരം അരിയാഹാരം പാടില്ല. ശിവരാത്രി നാളിൽ അതിരാവിലെ ഉണർന്ന് ശരീരശുദ്ധി വരുത്തി നിലവിളക്ക് കൊളുത്തി ശിവ നാമങ്ങൾ ജപിക്കുകയും ശിവക്ഷേത്ര ദർശനം നടത്തുകയും ചെയ്യുക.. ഈ ദിവസം പൂർണ ഉപവാസമെടുക്കുന്നതാണ് ഉചിതം.. അതിനു സാധിക്കാത്തവർക്ക് ഒരിയ്ക്കലെടുക്കാം. ക്ഷേത്രത്തിൽ നിന്നുളള നേദ്യമോ വെളളമോ പഴമോ കഴിക്കാവുന്നതാണ്. ശിവരാത്രി ദിവസം കഴിയുന്നത്ര തവണ പഞ്ചാക്ഷരീ മന്ത്രജപം ജപിക്കുക. ഭക്തിയോടെ ശിവ സഹസ്രനാമം, ബില്വാഷ്‌ടകം, ലിംഗാഷ്ടകം, ശിവാഷ്ടകം, ഉമാമഹേശ്വരസ്‌തോത്രം എന്നിവ ശിവരാത്രി ദിനത്തിൽ ജപിച്ചാൽ ഭഗവാന്റെ അനുഗ്രഹത്താൽ ജീവിതം ഐശ്വര്യപൂർണമാവും. സാധാരണ ദിവസങ്ങളിൽ ക്ഷേത്രത്തിലെക്കു സ്വന്തം വാഹനത്തിൽ വരുന്നവർ എറണാകുളത്തോ മറ്റു തെക്കൻ ജില്ലകളിൽ നിന്നോ ആണെങ്കിൽ NH 544 വഴി വന്നു ആലുവ കഴിഞ്ഞു മാർത്താണ്ഡ വർമ്മ പാലം ഇറങ്ങിയാൽ'ഉടൻ എത്തുന്ന തോട്ടക്കാട്ടു കര ജംഗ്ഷനിൽ നിന്നും വലത്തോട്ട് ഒരു കിലോമീറ്റർ പോയാൽ ഇവിടെയെത്താം.. കൊടുങ്ങല്ലൂർ അല്ലെങ്കിൽ തൃശൂർ ഭാഗത്തു നിന്ന് വരുന്നവരും തോട്ടക്കാട്ടു കര ജംഗ്ഷനിൽ എത്തി ഇടത്തോട്ട് തിരഞ്ഞു ക്ഷേത്രത്തിലെക്കു പോകാം. ക്ഷേത്രത്തോട് ചേർന്ന് തന്നെ നിരവധി വാഹനങ്ങൾ പാർക്ക് ചെയ്യാൻ സൗകര്യമുണ്ട്. ശിവരാത്രി സമയത്തു സ്വകാര്യ വാഹനങ്ങളിൽ ക്ഷേത്രത്തിലേക്കെത്താൻ സാധിക്കില്ല. പക്ഷെ KSRTC സ്പെഷ്യൽ സെർവീസുകൾ നടത്താറുണ്ട്. ട്രെയിനിൽ വരുന്നവർക്ക് ആലുവ സ്റ്റേഷൻ ആണ് ഏറ്റവും സൗകര്യപ്രദം. ഇവിടെനിന്നും ആലുവ പാലസിന് സമീപമുള്ള കൊട്ടാരക്കടവിലേക്കു ഒരു കിലോമീറ്ററോളമേ ദൂരമുള്ളൂ. അവിടെയുള്ള നടപ്പാലം കടന്നാൽ മണപ്പുറത്തെത്താം. ആലുവ മെട്രോ സ്റ്റേഷനിൽ ഇറങ്ങിയാലും കൊട്ടാരക്കടവിലേക്കു നടന്നു വരുന്നതായിരിക്കും സമയ ലാഭം. മെട്രോയും പുലർച്ചെ മുതൽ അർധരാത്രി വരയും ശിവരാത്രി സമയത്തു സ്പെഷ്യൽ സെർവീസുകൾ ഓപ്പറേറ്റ് ചെയ്യാറുണ്ട്.