Gradaim na Gaeltachta 2025 скачать в хорошем качестве

Gradaim na Gaeltachta 2025

Rinne Údarás na Gaeltachta ceiliúradh ar ghaiscí phobail na Gaeltachta ag Gradaim na Gaeltachta 2025 in Óstán Chois Fharraige aréir. Thug an Príomhfheidhmeannach Tomás Ó Síocháin agus an Cathaoirleach Siobhán Ní Ghadhra aitheantas do réimse leathan tograí atá ag cur le beocht eacnamaíoch, sóisialta agus cultúrtha na gceantar Gaeltachta. Dúirt Príomhfheidhmeannach Údarás na Gaeltachta, Tomás Ó Síocháin : "Is léiriú é an oíche anocht ar an tréith is tábhachtaí ar fad - ar fhealsúnacht agus ar dhúthracht na ndaoine atá ag tabhairt faoin obair seo. Ní amháin go bhfuil siad á déanamh ar mhaithe leo féin agus go minic a gclainne agus a muintire, ach ar son na gceantair, ar son na Gaeltachta agus ar son an sprioc tuaithe." Chuir Rónán Mac Con Iomaire, Stiúrthóir Forbartha Réigiúin, Pobail & Teanga, Údarás na Gaeltachta leis sin: “Tugann Gradaim na Gaeltachta aitheantas don obair rí-thábhachtach atá á dhéanamh ag eagrais forbartha pobail ar fud na Gaeltachta. Cuireann obair na n-eagrais seo go suntasach lenár gcuid pobail Ghaeltachta, agus leis an caighdeán maireachtála ina gcuid ceantair feidhme.” Buaiteoirí na gCatagóirí Togra Turasóireachta Bronnadh an gradam seo ar Chomhlacht Forbartha Áitiúil Acla CTR as a gcuid oibre ar an Uisceadán in Acaill, áit a bhfuil infheistíocht de €600,000 déanta le dhá bhliain anuas chun feabhas a chur ar an eispéaras, seirbhísí céadfach san áireamh. Togra Óige Chuaigh duais togra an óige chuig Céim Aniar CTR mar gheall ar an mbearna sa cheantar a aithint agus ranganna ceoil traidisiúnta a chur ar fáil d'óige Ros Goill i dTír Chonaill. Togra Gaeltacht Glas D’éirigh le Athchúrsáil Árann gradam na Gaeltachta Glaise a bhaint amach as ucht a dtionchar dearfach ó thaobh laghdú carbóin agus geilleagar ciorclach a chur chun cinn, togra a chuireann deis ar fáil do ghrúpaí agus ceantair eile foghlaim uathu. Togra Seirbhísí Sóisialta Tugadh gradam na Seirbhísí Sóisialta do Comhairle Ceantar na nOileán Teo mar aitheantas ar an lárionad spóirt a forbraíodh don cheantar. Tá páirc uile-aimsire ar an suíomh chomh maith le cosán siúlóide agus eolas faoi eachtraí agus stair an cheantair.  Togra Cultúir, Ealaíne & Oidhreachta Is le Comhar Fhánada agus Ghleann Bhairr CTR a chuaigh an gradam seo i mbliana as Féile Cheoil agus Chultúir Fhanada a reáchtáil den chéad uair i mí Bealtaine – comhpháirtíocht le Gaeltacht Bheo Fhánada agus Comhaltas Fhánada. Togra Fiontair Shóisialta Bhuaigh Forbairt na Dromoda Teo sa chatagóir Fiontraíochta Sóisialta lena dtogra teach ósta agus siopa pobail a cheannach ar iarratas ón phobal. Beidh Tábhairne na hÚine ina mol pobail ilúsáíde a neartóidh an saol sóisialta, cultúrtha agus eacnamaíoch sa cheantar. Gradam Phádraig Uí Aoláin agus Buaiteoir Réigiúin an Tuaiscirt Bronnadh Gradam Phádraig Uí Aoláin agus gradam réigiúin an Tuaiscirt ar Choiste Forbartha Éadan Fhionn Fraoich, coiste a bunaíodh in 2020 chun an Ghaeilge, imeachtaí sóisialta agus cultúrtha a chur chun cinn sa cheantar. Tá togra trasteorainn bunaithe acu le ceantar Ballinscreen i gContae Dhoire agus caoi bhreá curtha ar Halla Éadan Fhionn Fraoich mar lárionad teacht le chéile don phobal. Buaiteoir Réigiúin an Iarthair Chuaigh gradam réigiúin an Iarthair chuig Coiste Forbartha Chorr na Móna, coiste atá ar an mbóthar le breis is 50 bliain. Déanann an coiste forbairt agus cothabháil ar áiseanna pobail, reachtálann siad imeachtaí éagsúla i rith na bliana, agus tá siúlóid nua chomh maith le plean bithéagsúlachta don cheantar forbartha acu. Buaiteoir Réigiúin an Deiscirt Bhuaigh Cumann Léirithe Bhéal Átha'n Ghaorthaidh gradam réigiúin an Deiscirt as borradh a chur faoin drámaíocht agus na taibhealaíona i gceantar Mhúscraí. Chuir siad an ceoldráma 'An Tuairín Dubh' ar bun in 2023 agus 'Gobnait' in 2025 – léiriúcháin a raibh an-tóir orthu agus mórchuid den phobal páirteach iontu. Cuireann Gradaim na Gaeltachta béim ar an gcruthaitheacht agus ar an dúthracht atá le feiceáil i measc eagraíochtaí pobail na Gaeltachta. Tá na tograí seo ina n-eisleamáir den chaoi a bhfuil pobail ag dul i ngleic le dúshláin agus ag tapú deiseanna chun saol na gceantar a fheabhsú, an teanga a neartú, agus todhchaí inbhuanaithe a chinntiú don Ghaeltacht.