Takimi i Faton Topallit me bujqit e blegtorët, 24 prill 2012 скачать в хорошем качестве

Takimi i Faton Topallit me bujqit e blegtorët, 24 prill 2012

Më 24 prill 2012, nga ora 13:00, Lëvizja VETËVENDOSJE! ka vazhduar aktivitetin e saj fushatën për kryetar komune të Ferizajt. Radhën e kishte bujqësia dhe problemet e fshatit. Kandidati i Lëvizjes VETËVENDOSJE! për kryetar komune Faton Topalli, i shoqëruar nga nënkryetari i Lëvizjes Shpend Ahmeti dhe nënkryetarja Aida Dërguti, bashkë me një grup aktivistësh e qytetarësh kanë vizituar fshatin Mirash, për të mësuar nga afër problemet me të cilat përballen bujqit e blegtorët e komunës sonë. Me të mbërritur në këtë fshat piktoresk, edhe syri më i rëndomtë i vëren mundësitë që këtij fshati i ka dhënë natyra për zhvillimin e bujqësisë e blegtorisë. Në hyrje të fshatit takuam Idriz Lohajn, një fermer nga ky fshat që po kulloste bagëtitë. Idrizi bujqësinë e blegtorinë i kishte traditë familjare. Kishte 200 krerë qengja që me gjithë kujdesin e përkushtimin e tij, nuk arrinte dot të përfitojë nga shitja e tyre. "Qeveritë e shteteve fqinje po i subvencionojnë më shumë fermerët e tyre, si rezultat i kësaj ato po dalin me çmime më të lira në treg, e neve këndej, Qeveria jonë nuk po na e mbron tregun", tha Idrizi shkurt e shqip, atij ekonominë ia kishte mësuar jeta. Shkuam edhe në stallën e tij, i pamë nga afër kushtet e vështira në të cilat ai e mban bagëtinë. Prej tij mësuam se subvencionimi për bagëtitë nga ana e komunës sivjet ka zbritur përgjysmë krahasuar me vitin e kaluar, nga 10 euro në 5 euro. Ai na tregoi se dikur në fshatin Mirash banorët e këtij fshati kishin gjithsej 2000 krerë dele, ndërkaq sot numëron vetëm 350 sish.