სახელმწიფოსთვის შეუმჩნეველი გაჭირვება скачать в хорошем качестве

სახელმწიფოსთვის შეუმჩნეველი გაჭირვება

ირმა ნათენაძე სამ მცირეწლოვან შვილთან ერთად ახალციხეში, ნაქირავებ ბინაში ცხოვრობს. ორ ოთახს, სადაც ჭერი ჩამონგრეულია, კედლები კი დამსკდარი, სააბაზანო არ აქვს. ჭურჭელს კი ფაქტობრივად გარეთ რეცხავს. ბავშვებს აივანზე გასვლა ეკრძალებათ. ამორტიზებული იატაკი ნებისმიერ დროს შეიძლება ჩაინგრეს. მოზარდების კვების რაციონი ძირითადად, პურითა და კარტოფილით შემოიფარგლება. სახელმწიფო თითო ბავშვს თვეში მხოლოდ 10 ლარს უხდის. ამ თანხით, მოზარდების გამოკვება და მოვლა შეუძლებელია. ამიტომ ირმა ხშირად მძიმე ფიზიკურ სამუშაოს ასრულებს. სოციალური მომსახურების სააგენტომ ირმა ნათენაძესთან სტუმრად მყოფი ნათესავი, ოჯახის წევრად მიიჩნია და სტატუსი შეუჩერა. დახმარების ხელახალი მოთხოვნა მაღალი სარეიტინგო ქულებით დასრულდა. სოციალური მომსახურების სააგენტოში მიზეზად, ყოფილი მეუღლისთვის დაკისრებული ალიმენტი დაასახელეს. ირმა ნათენაძის სამ მცირეწლოვან შვილს მამისგან ალიმენტი არასდროს მიუღია. სოციალური მომსახურების სააგენტოში ამბობენ, რომ ნათენაძის საბანკო ანგარიში პერსონალური ინფორმაციაა და უწყება ალიმენტის გადახდას ვერ გადაამოწმებს. ირმამ აღსრულების ბიუროსაც მიმართა, თუმცა მათ გორში, ქმრის საცხოვრებელ ქალაქში გადაამისამართეს. მარტოხელა დედა იქ ჩასვლას ვერ ახერხებს და მზადაა ფურცელზე არსებული ალიმენტი სახელმწიფოსგან დახმარების მიღების სანაცვლოდ დათმოს. ამჟამად ოჯახის შემოსავალი დღიური და არასტაბილურია. პეტრე ჩილინგარაშვილი მუშის მოსასვენებლ ქოხში ცხოვრობს. სახლის აშენება ვეღარ მოასწრო. 78 წლის კაცისთვის, ეს რამდენიმე კვადრატული მეტრია საძინებელიც და სამზარეულოც. მარტოხელა მოხუცს გადაადგილება უჭირს. ის არალში მეზობლების იმედადაა. მარტოხელა მამაკაცი სოციალურ დახმარებას 2006 წლიდან ცხრა წლის განმავლობაში იღებდა. მის სახელზე არც სახლი და არც მიწის ნაკვეთია რეგისტრირებული, თუმცა სარეიტინგო ქულა 37 000–დან 97 000–მდე აეწია. პეტრე ჩილინგარაშვილის ერთადერთი შემოსავალი პენსიაა, სამხედრო დანამატით. 238 ლარი კომუნალურ გადასახადებზე, მედიკამენტებსა და საკვებზე ძლივს ჰყოფნის. სოციალური მომსახურების სააგენტოში ამბობენ, რომ პეტრე ჩილინგარაშვილი სახელმწიფოსგან პენსიის სახით, საკმარის დახმარებას იღებს. სოციალურად დაუცველის სტატუსის შეჩერება კი არაერთმა ფაქტორმა განაპირობა. სოციალური დახმარების დანიშნულება ის უნდა იყოს, რომ მოქალაქე სიღარიბის ზღვარს ქვემოთ არ აღმოჩნდეს – ამბობენ სპეციალისტები. ეკონომისტების თქმით, სახელმწიფომ ისეთი მეთოდის შემუშავებაზე უნდა იზრუნოს, რომელიც შეჭირვებულ ოჯახს სოციალურად დაუცველის სტატუსიდან თავის დაღწევაში დაეხმარება და მუშაობის სტიმულს არ დაუკარგავს. სოსო არჩვაძეს მაგალითად განვითარებული ქვეყნების გამოცდილება მოჰყავს. დეკლარაციის შევსებისას, სოციალური მომსახურების სააგენტო არ ითვალისწინებს საცხოვრებელი სახლი შეჭირვებულის საკუთრებაშია თუ ნაქირავებში ცხოვრობს. არც საყოფაცხოვრებო პირობებს ენიჭება ყურადღება. არ ხდება ბენეფიციარის ჯანმრთელობის მდგომარეობის გათვალისწინება. დღიური, არასტაბილური და დახმარებაზე ბევრად ნაკლები შემოსავალი, სოციალურად დაუცველის სტატუსის შეწყვეტის მიზეზი ხდება. ირმა სამი შვილით და პეტრე პაპა უმძიმეს პირობებში ცხოვრობენ, თუმცა სისტემისთვის ეს საკმარისი არგუმენტი არ არის.