Աչքս բաց եմ արել աշխատանքի մեջ․ խորհրդային տարիների բրիգադիր Խաչատուրի կյանքի դասերը՝ Չինարիից скачать в хорошем качестве

Աչքս բաց եմ արել աշխատանքի մեջ․ խորհրդային տարիների բրիգադիր Խաչատուրի կյանքի դասերը՝ Չինարիից

84 տարեկան է Չինարիում բոլորին հայտնի բրիգադիր Խաչատուրը։ Մի ամբողջ կոլեկտիվ ղեկավարելու ոչ այնքան դյուրին ժամանակներից տասնամյակներ են անցել, բայց այսօր էլ՝ Խաչատուր պապը շարունակում է խորհրդային աշխատանքային խիստ ռեժիմով ապրել՝ արթնանում է առավոտ կանուխ, աշխատում՝ քանի դեռ արևը մայր չի մտել։ Օրվա մեծ մասը սեփական այգում է անցկացնում Խաչատուր Միրզոյանը՝ կնոջ՝ Գեղեցիկի հետ միասին։ Տիկին Գեղեցիկը նկարահանվել չի սիրում, բայց անասելի աշխատասեր է․ Խաչատուր պապն անթաքույց հիացմունքով խոստովանում է՝ աշխատասիրությամբ նույնիսկ իրեն է գերազանցում կինը։ Տանը կից այգում անուշահամ խաղողի որթերի, թզենիների, հոնի, դեղձենիների ու տարատեսակ մրգերի, բանջարեղենների կողքին հատուկ տեղ են զբաղեցնում հատապտուղները, դաշտային ու դեկորատիվ ծաղիկները։ Երեք զավակ ունեն Միրզոյան ամուսինները։ Աղջիկներն ամուսնացել են, գյուղից գնացել, միակ որդին շարունակում է ապրել Չինարիում։ Արցախյան առաջին պատերազմում թշնամու դիպուկահարի կրակոցից ծանր վիրավորում է ստացել։ Առաջին խմբի հաշմանդամ է։ Որդու մասին խոսելիս չափազանց զուսպ են ծնողները, սահմանափակ տեղեկություններն էլ բանավոր զրույցի ժամանակ են պատմում։ Չնայած զբաղվածությանը՝ Խաչատուր պապը հասցնում է նաև միջազգային ու տեղական նորություններին հետևել, իրավիճակը վերլուծել, զուգահեռներ անցկացնել աշխարհում ու Հայաստանում տեղի ունեցող զարգացումների միջև։ Օրվա իշխանավորներին հորդորում է պատմությունն ու պատմականը մոռանալու կոչերի փոխարեն դասեր քաղել՝ անցյալից, պատմությունից, աշխարհում և տարածաշրջանում տեղի ունեցող իրադարձություններից։ Ասում է՝ փորձված բան է՝ հայի մտքից, սրտից ու գեներից ո՛չ գրչով, ո՛չ էլ բանավոր կոչերով չես կարող ջնջել Արցախը, Արարատը, Հայոց ցեղասպանությունն ու պատմական հիշողությունը։ 90-ականներից սկսած՝ ադրբեջանական զորքի նշանառության տակ գտնվող Չինարիում թշնամու կրակոցները չեն դադարել։ Խաչատուր պապի խոսքով՝ գյուղի բնակչությունը վերջին երեք տասնամյակում ավելի քան երեք անգամ նվազել է։ Վերջին մեկ տարում խորհրդավոր լռություն է․ թշնամին չի կրակում։ Չինարին Տավուշի մարզի Բերդ համայնքի գյուղերից է։ Գտնվում է հայ-ադրբեջանական շփման գծի հարևանությամբ։ Հեռավորությունը Երևանից 235 կմ է։