USAID ပျက်သုဥ်းခြင်းနဲ့ ဘားမားအက် အလားအလာ - BBC News မြန်မာ скачать в хорошем качестве

USAID ပျက်သုဥ်းခြင်းနဲ့ ဘားမားအက် အလားအလာ - BBC News မြန်မာ

ဒေါ်နယ်ထရမ့်ရဲ့ တကျော့ပြန် အိမ်ဖြူတော် ကာလ ထရမ့် 2.0 ရဲ့ ကနဦး သီတင်းပတ်တွေ အတွင်းမှာပဲ သူဖော်ဆောင်နေတဲ့ မူဝါဒတွေဟာ ပြည်တွင်းပြည်ပကို အရှိန်အဟုန်ပြင်းပြင်း ရိုက်ခတ်လာပါတယ်။ ပြည်တွင်းမှာ လူဝင်မှု ဆိုင်ရာ ကိစ္စတွေ တင်းကျပ်ပြီး အစုလိုက် အပြုံလိုက် ပြည်နှင်ဒဏ် ပေးတာမျိုး၊ ယောက်ျား မိန်းမ ရယ်လို့ လိင်အမျိုးစား နှစ်မျိုးကိုပဲ တရားဝင် အသိအမှတ်ပြုတယ်ဆိုတဲ့ သမ္မတ အမိန့် ထုတ်တာမျိုးတွေ ပြုလုပ်ပါတယ်။ စီးပွားရေးသမား အီလွန်မာ့စ်ကို ဦးဆောင်စေတဲ့ အစိုးရ စွမ်းဆောင်ရည် ဌာန ဒို့ဂျ် DOGE ဆိုတာကို ဖွဲ့ပြီး အစိုးရ အသုံးစားရိတ်တွေ မလိုအပ်ပဲ ကုန်နေတာ၊ ဖြုန်းတီးနေတာတွေ ဖော်ထုတ်ဖို့ ဆိုတဲ့ အကြောင်းပြချက်နဲ့ ဖက်ဒရယ် အစိုးရ အေဂျင်စီတွေရဲ့ အချက်အလက် ဒေတာတွေကို ရယူပါတယ်။ တခါ၊ နိုင်ငံခြားရေး မူဝါဒပိုင်းကို ကြည့်ရင်လည်း ဂါဇာကို အမေရိကန်က လက်လွှဲယူပြီး အဲဒီက ပါလက်စတိုင်းတွေကို ဘေးပတ်ဝန်းကျင်က အာရပ်နိုင်ငံတွေထဲ နေရာချမယ်လို့ ပြောတာက အစ၊ ယူကရိန်းထဲ ရုရှားက ဝင်ရောက်တိုက်ခိုက်တဲ့ စစ်ပွဲနဲ့ ပတ်သက်ပြီးတော့ ဥရောပ မဟာမိတ် တွေနဲ့ ကွဲလွဲပြီး ယူကရိန်း အပေါ် ဖိအားပေး၊ ရုရှားနဲ့ နီးစပ်တဲ့ ရပ်တည်မှုမျိုးကို ပြသပါတယ်။ ပြည်တွင်းရော ပြည်ပမှာပါ ရိုက်ခတ်ခံရတဲ့ ကိစ္စကတော့ အမေရိကန် ဗဟို အစိုးရ ဌာနတစ်ခု ဖြစ်တဲ့ နိုင်ငံတကာ ဖွံ့ဖြိုးရေး အေဂျင်စီ ယူအက်စ် အေအိုင်ဒီကို ဖျက်ဖို့ အထိ စိုင်းပြင်းလာတဲ့ လုပ်ရပ်ဖြစ်ပါတယ်။ ဝန်ထမ်းထောင်ပေါင်း များစွာကို အလုပ်ကနေ ရပ်နားလိုက်ပြီး နိုင်ငံရပ်ခြား ထောက်ပံ့မှုတွေကို ရက် ၉၀ ဆိုင်းငံ့ လိုက်ပါတယ်။ အဲဒီလို စာနာမှု အကူအညီတွေ ဖြတ်တောက် ခံရတဲ့ အတွက် ချက်ခြင်းလက်ငင်း ဆိုသလို သက်ရောက် ရိုက်ခတ် ခံရတဲ့ အထဲ ထိုင်း- မြန်မာ နယ်စပ်က ဒုက္ခသည်စခန်းတွေမှာ ကူညီရေး လုပ်နေတဲ့ အဖွဲ့တွေ၊ ကျန်းမာရေး စောင့်ရှောက်မှု ပေးနေတဲ့ ဆေးခန်းတွေ ပါဝင်ပါတယ်။ ဒီတစ်ပတ်မှာတော့ ယူအက်စ်အေအိုင်ဒီ ကို ဆိုင်းငံ့တာကြောင့် မြန်မာ့အရေး အပေါ် ဘယ်လို သက်ရောက်သလဲ၊ မြန်မာ့ ဒီမိုကရေစီ အရေးကို အကူအညီပေးမယ် ဆိုပြီး ပြဌာန်းထားတဲ့ ဘားမားအက် ဥပဒေ ဘာဆက် ဖြစ်လာမလဲ၊ အမေရိကန် အမျိုးသား လုံခြုံရေး အပေါ် ခြိမ်းခြောက်တဲ့ နိုင်ငံတွေ စာရင်းထဲ မြန်မာကို ဆက်လက် ထည့်သွင်းထားတဲ့ ထရမ့် အစိုးရ အနေနဲ့ မြန်မာ့အရေး အပေါ် ဘယ်ပုံ ဘယ်နည်း သဘောထားနိုင်သလဲ ... တရုတ်နဲ့ ယှဥ်ပြိုင်တဲ့ ကျယ်ပြန့်တဲ့ မဟာဗျူဟာထဲ မြန်မာကို ထည့်သွင်းမှာလား .... NUG အပါအဝင် ဒီမိုကရက်တစ် အင်အားစုတွေနဲ့ အမေရိကန် အစိုးရကြား ဆက်ဆံရေး ပြောင်းလဲသွားမှာလား ... စတာတွေကို ကျယ်ကျယ်ပြန့်ပြန့် ဆွေးနွေးသွားမှာ ဖြစ်ပါတယ်။ ဒီတစ်ပတ် ပါဝင်ဆွေးနွေးကြသူတွေကတော့ အမေရိကန်ပြည်ထောင်စုရဲ့ မြန်မာနိုင်ငံဆိုင်ရာ သံအမတ်ကြီး အဖြစ် တာဝန် ထမ်းဆောင်ခဲ့သူလည်း ဖြစ်၊ အမေရိကန် နိုင်ငံခြားရေး ဝန်ကြီးဌာနရဲ့ အာရှ အရှေ့ပိုင်းနဲ့ ပစိဖိတ်ရေးရာမှာ လက်ထောက် ဒုဝန်ကြီး အဖြစ် ဆောင်ရွက်ခဲ့သူ ဝါရင့် ထိပ်တန်း သံတမန်ဟောင်း စကော့မာဆီရယ်နဲ့ မြန်မာ အပါအဝင် အရှေ့တောင် အာရှ ရေးရာ ကျွမ်းကျင်သူ သုတေသီ ဖြစ်ပြီး၊ နိုင်ငံတကာ သုတေသန အဖွဲ့တွေရဲ့ စစ်တမ်းတွေ၊ နိုင်ငံတကာ စာစောင်တွေမှာ မြန်မာ့အရေး အကြောင်း ရေးသားနေသူ ဝါရှင်တန်ဒီစီ မြို့တော် အခြေစိုက် ဟန်တာ မာစတန် တို့ ဖြစ်ပါတယ်။ ဘီဘီစီ သတင်းထောက် ကိုဝေဖြိုး စီစဥ် တင်ဆက်ထားတာကို ဖေဖော်ဝါရီ ၂၂ ရက်၊ စနေည မြန်မာစံတော်ချိန် ည ၈ နာရီ အချိန်မှာ ဘီဘီစီ မြန်မာပိုင်းရဲ့ ဖေ့စ်ဘုတ် စာမျက်နှာနဲ့၊ ည ၈ နာရီခွဲ အချိန် ဘီဘီစီမြန်မာပိုင်းရဲ့ ယူကျုချန်နယ် တို့ကနေ ထုတ်လွှင့် သွားမှာမို့ စောင့်မျှော် ကြည့်ရှုနိုင်ကြပါတယ်။ #ဘီဘီစီမြန်မာပိုင်း #သတင်းမြင်ကွင်း