【中鐵線駁東北葵入市區線我舉腳贊成 但300億駁去迫爆嘅東鐵線絕不可取 40億接駁荃灣線係不二之選】 скачать в хорошем качестве

【中鐵線駁東北葵入市區線我舉腳贊成 但300億駁去迫爆嘅東鐵線絕不可取 40億接駁荃灣線係不二之選】

今日交通事務委員會討論行政長官2022年施政報告嘅交通內容，我就住施政報告提出嘅「中鐵線」，即係北環線由錦上路南延，經葵涌至九龍塘，提出嚴重關注同反建議。 北部都會區日後有古洞同新界北新市鎮嘅33萬新增人口，主要都係坐落馬洲支線同東鐵線出市區或者直達金鐘。其中，古洞站同粉嶺站都係東鐵線嘅上游站，無人會坐北環線南行，去到東鐵線下游嘅九龍塘站先上車。到時上到車咩？因為我深信政府漠視咗將來33萬新增人口對東鐵線嘅額外擠迫。 雖然我反對將中鐵線南延至九龍塘，但係就舉腳贊成將中鐵線南延到東北葵，令到梨木樹、大白田、安蔭、石蔭、石籬一帶接近13萬6千嘅人口都可以有鐵路搭，亦都係我以前喺荃葵服務時，一直有爭取嘅野來。不過最緊要嘅，就係之後接駁去邊條缐嘅邊個站！ 依家興建鐵路成本大約係40億/公里，並唔包起車站成本。由石籬去九龍塘大約8公里，成本約320億，考慮埋上唔到車嘅問題，接駁到九龍塘係豪無意義嘅。 而比較合理嘅做法，就係接駁到美孚，因為美孚站嘅屯馬線同荃灣線中間有地，北部區同東北葵嘅居民都可以係呢度選擇屯馬線或者荃灣線出市區同過海。不過因為石籬到美孚大約有5公里，成本都唔平，需要200億。 最最符合成本效益嘅，就係由石籬接駁去荃灣線嘅葵芳站出市區或者過海。當中，葵芳同葵興中間亦都有地可以起站，而經濟效益就超高，因為距離石籬只有1公里，成本只係40億。最大好處就係屯馬線嘅乘客去九龍中都可以係錦田轉車，而唔洗係美孚行8分鐘去荃灣線。 總括來講，接駁去荃灣線一定係不二之選。東鐵線過海之後，太子、旺角上車嘅人大幅減少，荃灣線多左15%剩餘載客量，配合日後更新信號系統之後，荃灣線可以會有多剩餘16%載客量，總共31%剩餘量。 呢個建議我係衷心奉獻俾政府，希望政府可以嚴肅同認真去考慮。局長亦都回應指我提出嘅內容都好豐富，亦都會考慮有關方案，而九龍塘站作為東鐵線同觀塘線嘅轉乘站，都有一定作用。不過，日後都會就日後鐵路發展作出公眾諮詢，局長同我一齊互相交流。