Tv Klan - Vjosa dhe Erzeni dalin nga shtrati, përmbyten banesat скачать в хорошем качестве

Tv Klan - Vjosa dhe Erzeni dalin nga shtrati, përmbyten banesat

Moti i keq me reshje shiu, dëbore dhe temperatura të ulëta po mban të mbërthyer Shqipërinë. Në qarkun e Durrësit situata vijon të jetë e vështirë pasi lumi Erzen ka dalë nga shtrati në Sukth, duke përmbytur tokat bujqësore dhe banesat. Autoritetet nisën evakuimin e menjëhershëm të banorëve nga Sukthi dhe Katundi i Ri. Siç shihet në pamje, uji ka mbuluar rrugët në Sukth, duke vështirësuar edhe lëvizjen. Problematike mbetet situata në zonën e Ish-Kënetës, Shkozetit dhe Nishtullës, ku ka prezencë uji në rreth 800 banesa dhe biznese. Rreth 300 persona janë evakuuar nga këto zona. Moti i keq ka shënuar edhe një viktimë, pasi një 56-vjeçar, punonjës i ndërmarrjes komunale të Durrësit, dyshohet se është marrë nga rrjedha e ujit në një kanal kullues në afërsi të ish-repartit ushtarak. Banorët shprehen: “Dëmet mos t’i llogarisim. Është e gjithë kënetë në ujë. Brenda vitit jemi përmbytur tre herë.” “Katër herë jam përmbytur, akoma nuk kam larë borxhin e parë në bankë. M’i ka prishur krejt mobiljet dhe s’kam ku hyj brenda.” Ndërkohë, Prokuroria e Durrësit ka nisur hetimet për përmbytjet, nëse kanë ardhur për shkaqe natyrore apo për mos përmbushje të detyrës dhe neglizhencës. Organi i akuzës sqaron se procedimi penal është regjistruar për veprat penale “Shpërdorim detyre”, “Shkatërrim prone me përmbytje” dhe “Shkatërrim prone nga pakujdesia”. Në qarkun e Vlorës, lumi Vjosë ka dalë nga shtrati dhe rrezikohen nga përmbytja fshatrat Bishan, Fitore dhe Novoselë. Në Mifol është çarë argjinatura, uji ka depërtuar në toka bujqësore dhe oborre banesash. Situata paraqitet më e rëndë në fshatin Bishan, ku raportohet për sera të dëmtuara, bagëti dhe shpendë të ngordhur, si dhe disa shtëpi nën ujë. Nga Gjirokastra, në mbledhjen e Komitetit të Emergjencave për jugun e vendit, zëvendëskryeministrja Belinda Balluku tha se niveli i Vjosës ka pësuar një rënie të lehtë. “Krahasuar me nivelin që kemi pasur sot në pikën e matjes në Memaliaj që ka qenë 8 metra, ka rënë në 6.5. Kemi një ulje që do të reflektohet edhe në zonën e Novoselës në grykëderdhje. Ky është një lajm i mirë.” Në terren, efektivët e forcave të armatosura kryen evakuimin e banorëve të tre fshatrave në Novoselë dhe një në Fier. Është çarë argjinatura e kanalit të Martinës në Ferras të Fierit. Uji ka hyrë në fshat duke rrezikuar banesat. Autoritetet po ndërhyjnë, duke mos përjashtuar masa për evakuimin e banorëve. Konvikti i shkollës profesionale “Rakip Kryeziu” në Fermë Çlirim është gati për strehimin e banorëve të evakuuar. Balluku tha: “Menjëherë pas kalimit të kësaj situate, në bashkëpunim me pushtetin vendor, do të ketë identifikim të dëmeve dhe padyshim kompensim. Buxheti i shtetit parashikon fondin rezervë për raste të tilla.” Në Lezhë, situata vijon të jetë problematike në zonat rurale, ku rreth 4 mijë hektarë tokë bujqësore janë nën ujë, ndërsa mbi 100 banesa janë të rrethuara. Tetë familje janë evakuuar. Probleme ka edhe në lagjen Sanxhak dhe fshatin Gjorm të Kurbinit. Pasditen e së enjtes është mbyllur argjinatura e dëmtuar e lumit Drojë. Në Torovicë, 2,500 ha tokë ndodhen nën ujë. Ministri i Bujqësisë, Andis Salla, theksoi se prioritet mbetet siguria e banorëve, ndërsa më pas do të vijojë evidentimi i dëmeve. Situata është drejt normalizimit, pasi prurjet e lumenjve dhe përrenjve kanë rënë, megjithëse në disa zona ka ende prani uji. Reshjet e dendura të shiut kanë shkaktuar probleme edhe në qarkun e Korçës. Njëra prej korsive Pogradec-Qafë Thanë është e bllokuar nga inertet. Fusha e Maliqit vijon të jetë e mbuluar nga uji dhe dëbora. Për shkak të rrëshqitjeve të dherave, është mbyllur aksi “Qukës-Qafë Plloçë”. Reshjet e dëborës kanë përfshirë edhe zonat malore të Elbasanit dhe Dibrës. Prej ditës së premte, 9 janar, pritet rënie e prurjeve dhe niveleve në të gjithë lumenjtë. Tv Klan SUBSCRIBE to “RTV KLAN” on YouTube for more videos! Email: info@tvklan.al Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow Tvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/