Eastern Visayas, nakaghipatik hin 2.5% nga inflation rate dida han Enero 2026 скачать в хорошем качестве

Eastern Visayas, nakaghipatik hin 2.5% nga inflation rate dida han Enero 2026

TACLOBAN CITY – Nakaghipatik hin 2.5% nga inflation rate o kalaksi han paghitaas han presyo han mga papliton ngan serbisyo an Sinirangan Bisayas dida han nakalabay nga Enero 2026, doble han porsyento nga nahipatik dida han nakalabay nga bulan, subay ha ginpagawas nga datos han Philippine Statistics Authority (PSA) Kun igkukumpara, mas hitaas an nahipatik nga inflation dida han nakalabay nga bulan kumpara han 1.4% nga nahipatik dida han Disyembre 2025. Sumala kan PSA Region 8 Chief Statistical Specialist Mae Almonte, an paghitaas han regional rate dida han Enero in mahitungod han impluwensya han mahinay nga pagkiwa han presyo han mga pagkaon ngan non-alcoholic beverages ha 1.4 percent dida han nakalabay nga bulan han Disyembre. Nakita an hitaas nga inflation rate ha mga karne ngan mantika, tambok, harina, tinapay, ngan iba pa nga karan-on, pasta products, ngan iba nga cereals. May-ada gihapon kalaksi han inflation rate ha balay, tubig, kuryente, gas, ngan iba pa ha 3.2% tikang ha 1.2% dida han nakalabay nga bulan. Lakip gihapon an mga kaunan ngan accomodation services ha mga nakadugang ha inflation rate, kun diin tikang ha 0.8% dida han Disyembre 2025 in nagin 2.2% ini dida han Enero yana nga tuig. Lima naman ha unom nga probinsya han rehiyon an nakaghipatik hin hitaas nga inflation rate ha syahan nga bulan hantuig-2026. x Ha lima nga probinsya, an Samar an nakaghipatik hin pinakahitaas kun diin tikang ha 2.7% in sumaka ini ha 5% dida han Enero. Ginsundan naman ine han Eastern Samar, kun diin tikang ha 0.2% in nagin 1.2% ine. Sumunod gihapon an Biliran nga nakaghipatik hin 2.4% nga inflation rate dida han Enero tikang ha 1.7%; an Leyte ha 2.3% tikang ha 1.3. Gutiay la naman an nagin pagkiwa han Northern Samar, kun diin tikang ha 0.5% in nagin 0.6% la ine dida han Enero. Samtang an napabilin haman han Southern Leyte ha 1.7% an inflation rate hini ha duha nga magka-sunod nga bulan. An Tacloban naman kumo nag-uusan nga highly urbanized city ha rehiyon, in nakaghipatik hin 2.6% nga inflation rate dida han Enero, mas hitaas kumpara ha 2% nga IR hini dida han Disyembre. Ginklaro naman han Philippine Statistics Authority nga an hamubo nga inflation rate in dire nangangaruyag sidngon nga naubos an presyo han mga produkto, lugod, ginpapasabot hini nga padayon nga nahitaas an presyo han mga papliton pero ha mas mahinay nga dalagan. via | Bombo Veronica Ocasla