ပုလဲမြို့ ဆီ စစ်အင်အားဖြည့်လာလို့ ဒေသခံတွေ ညတွင်းချင်း စစ်ရှောင်ရ | People's Spring скачать в хорошем качестве

ပုလဲမြို့ ဆီ စစ်အင်အားဖြည့်လာလို့ ဒေသခံတွေ ညတွင်းချင်း စစ်ရှောင်ရ | People's Spring

ပုလဲမြို့ ဆီ စစ်အင်အားဖြည့်လာလို့ ဒေသခံတွေ ညတွင်းချင်း စစ်ရှောင်ရ ဇွန်-၁၂၊ ၂၀၂၅ / People Spring စစ်ကိုင်းတိုင်း၊ ပုလဲမြို့နယ်က တိုက်ပွဲတွေမှာ အထိနာပြီးတဲ့နောက် ဇွန်လ ၁၁ ရက် မနေ့ညပိုင်းမှာ ပုလဲမြို့ဆီ စစ်ကောင်စီတပ်က ​လေ​ကြောင်းက​နေ စစ်ကူ​တွေပို့ခဲ့တာကြောင့် မြို့​ပေါ်က ပြည်သူ​တွေ ညတွင်းချင်း စစ်ဘေးရှောင်ခဲ့ရတယ်လို့ ဒေသခံတွေက​ ပြောပါတယ်။ မနေ့ည ၈နာရီခွဲမှာ စစ်ကောင်စီက သယ်ယူပို့ဆောင်ရေးလေယာဉ် Y-12နဲ့ ပုလဲမြို့ပေါ်က ထွေအုပ်ရုံးထဲကို အင်အား ၁၀၀ကျော် ချခဲ့တာလို့ သိရပါတယ်။ "အတိအကျမသိနိုင်တာ ညဆိုတော့ ၊ ပစ္စည်းချတာလည်း ဖြစ်နိုင်တယ် ၊ ဒါပေမဲ့ စုံစမ်းလို့ရသလောက်ကတော့ လူအင်အားလို့ သိရတယ်"လို့ ဒေသခံတစ်ဦးက People’s Springကို ပြောပါတယ်။ ဒါ့အပြင် တိုက်ပွဲဖြစ်ပွားရာ ကန့်ဒေါင့်ရွာ အနီးက မြကုန်း၊ ဇောင်ဂျမ်းကုန်း၊ ကျွန်းဘိုကုန်း၊ ကုက္ကိုလ်ကုန်း၊ စေတီယုံ ကျေးရွာ နဲ့ ပုလဲ-ဂန့်ဂါလမ်းပိုင်း တောင်ဘက်ခြမ်းက ကျေးရွာအားလုံးနီးပါး စစ်ရှောင်နေရတယ်လို့ သိရပါတယ်။ ပုလဲမြို့​ပေါ်မှာ စစ်ကောင်စီ တပ်စွဲထားတဲ့ ထွေအုပ်ရုံး ၊ မြို့နယ် ရဲစခန်းနဲ့ ကန့်ဒေါင့်၊ ဇီးဖြူကုန်း၊ အင်မထီးရွာတွေကို ပြည်သူ့ကာကွယ်ရေးတပ်ဖွဲ့တွေက ဖြတ်တောက်ပိတ်ဆို့ထားလို့ စစ်ကောင်စီတပ်က လေကြောင်းကနေပဲ အင်အားဖြည့်နိုင်တော့တာလို့သိရပါတယ်။ ပုလဲမြို့နယ်မှာ ကန့်ဒေါင့်ရွာနယ်မြေ ရဲစခန်းကို ဇွန်လ၂ရက်နေ့က စတင်ပြီး ပြည်သူ့လွတ်မြောက်ရေးတပ်မတော်(PLA)ဦးဆောင်တဲ့​ တော်လှန်​ရေးတပ်​တွေက တိုက်ခိုက် နေပါတယ်။ ကန့်ဒေါင့်စခန်းသိမ်းတိုက်ပွဲ မစတင်ခင်ကလည်း ကျေးရွာအချို့ ကြိုတင်တိမ်းရှောင်ခဲ့ကြတယ်လို့လည်း ဒေသခံတွေက ပြောပါတယ်။ ဇွန်လ ၁၀ ရက်​မှာတော့ NUG ရဲ့ကာကွယ်​ရေးဝန်ကြီးဌာန လက်အောက်ခံ PDF ခရိုင်တပ်ရင်း​တွေ၊ ပြည်သူ့ကာကွယ်ရေးအဖွဲ့ (ပ. က. ဖ) ​တို့ပါဝင်တဲ့ ပူး​ပေါင်းတပ်​တွေက ဇီးဖြူကုန်းရွာက ပျူစောထီးစခန်း​တွေကို လည်း ထိုးစစ်ဆင်တိုက်ခိုက်နေတယ်လို့ PDF တချို့က​ ပြောပါတယ်။ ဒါ့အပြင် အင်မထီးပျူစောထီးရွာကနေ ကန့်ဒေါင့်ရဲစခန်းဆီ စစ်ကူတက်လာတဲ့ စစ်ကြောင်းကိုလည်း တော်လှန်ရေးတပ်ဖွဲ့တွေက ကြားဖြတ် တိုက်ခိုက်တာရှိပါတယ်။ ကန့်​ဒေါင့်ရဲစခန်းတိုက်ပွဲနဲ့ပတ်သက်တဲ့ အသေးစိတ်အခြေအနေကို တိုက်ပွဲပြီးစီးမှသာ ထုတ်ပြန်မယ်လို့ PLAပြောရေးဆိုခွင့်ရှိသူက ပြောပါတယ်။ ကန့်ဒေါင့်ရဲစခန်းကို တော်လှန်ရေးတပ်ဖွဲ့တွေက ဝိုင်းဝန်းပိတ်ဆို့ထားနိုင်ပြီး တိုက်ပွဲလည်း ဆက်ဖြစ်နေတယ်လို့ ဆိုပါတယ်။ ဇွန်လ ၁၀ရက် နေ့ခင်းပိုင်းက ပုလဲမြို့နယ်ထဲက ကျေးရွာတွေကို ဗုံးလာကြဲတဲ့ စစ်ကောင်စီတပ်ရဲ့ ဂျက်တိုက်လေယာဉ် တစ်စီးကို တော်လှန်ရေးတပ်တွေက ပစ်ချခဲ့တာကြောင့် ပျက်ကျမီးလောင်ခဲ့ပါတယ်။ အဲဒီဖြစ်စဥ်မှာ တိိုက်လေယာဉ် မှုး သေဆုံးသွားတယ်လို့ PLA က မနေ့က အတည်ပြုခဲ့ပြီး ပျက်ကျတဲ့နေရာအနီးက အရပ်သားလေးဦးလည်း သေဆုံးခဲ့ရတယ်လို့သိရပါတယ်။ #ludunwayoo #လူထုနွေဦး #NewsUpdate 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 𝗬𝗼𝘂𝗧𝘂𝗯𝗲 -    / @peoplespring   𝗙𝗮𝗰𝗲𝗯𝗼𝗼𝗸 -   / ludunwayoo   𝗪𝗲𝗯𝘀𝗶𝘁𝗲 - https://www.ludunwayoo.com/ 𝗜𝗻𝘀𝘁𝗮𝗴𝗿𝗮𝗺 -   / ludunwayoo   𝗧𝗲𝗹𝗲𝗴𝗿𝗮𝗺 - https://t.me/peoplespring