1. Die geheim tot sukses | Geloofslesse Uit Josua Se Lewe скачать в хорошем качестве

1. Die geheim tot sukses | Geloofslesse Uit Josua Se Lewe

Andre en Rebecca Joubert “‘Wees net baie dapper en sterk, sodat jy die hele wet wat Moses, my dienskneg, jou beveel het, nougeset uitvoer. Moenie links of regs daarvan afwyk nie, sodat jy sukses kan behaal oral waar jy gaan’” (Josua 1:7, AFR20). In ’n stadium het Benjamin Zander, die musiekkoördineerder van die Boston Filharmoniese Orkes, ’n klas oor musiekvertolking aangebied. Met die intrapslag bespeur Zander ’n angstigheid by studente oor die evaluering van hul musiekuitvoerings. In ’n poging om hulle gerus te stel en hul ware potensiaal na vore te bring, kondig hy toe op die eerste dag aan dat elkeen ’n A vir die klas sou kry. Hierdie A was dus nie ’n verwagting [wat met mag en mening nagestreef word nie], “maar ’n moontlikheid waarin die student hom/haar kon inleef.” Al vereiste was dat elkeen binne die eerste twee weke van die semester ’n brief moes skryf, maar gedateer vir die heel laaste dag van daardie module. In die brief moes die student verduidelik waarom hy/sy die hoogste prestasie — ’n A — verdien het. Die boek Josua gaan oor splinternuwe moontlikhede. 40 jaar lank het Moses ’n dominante rol in Israel se geskiedenis gespeel. Nou het dit tot ’n einde gekom. Die uittog uit Egipte en die woestynomswerwinge, daardie tragiese tydvak van rebellie en hardkoppigheid, was oor en verby. ’n Nuwe geslag, een bereid om die Here gehoorsaam te wees, was gereed om die Beloofde Land in te gaan; nie as ’n verwagting wat die Israeliete [vergeefs] probeer nastreef nie, maar as ’n moontlikheid waarin die volk hulle kon inleef. Kom ons kyk hoe die Here ’n nuwe deur vir Israel van ouds oopgemaak het, en hoe Hy dit ook vir ons vandag kan doen.