Қазақстанның картасынан тағы 83 ауыл жойылды скачать в хорошем качестве

Қазақстанның картасынан тағы 83 ауыл жойылды

Қазақстанның картасынан тағы 83 ауыл жойылды. Бұл елдімекендерде мектеп жабылып, жұмыссыздық белең алған. Соның кесірінен халық саны елу адамға да жетпей қалған. Ұлттық статистика бюросының мәліметінше, жабылған ауылдардың 80 пайызы еліміздің солтүстігінде орналасқан. Еліміздің солтүстігінде 45 ауыл картадан жойылды. Өйткені өркениеттен алшақтап, мектептердің есігіне қара құлып салынған соң халық үдере көшті. Ал шенеуніктер санаулы ғана үй қалған ауылдарды ұстап тұру экономикалық тұрғыда тиімсіз дейді. Сондықтан тағы 100 елдімекен болашағы жоқ ауылдар санатына енгізіліпті. Бұл тізімде Красноперовка да бар. АТЛАС ФАЙРУШИН, Красноперовка ауылының тұрғыны: Әйелім бала-шағаммен бірге қалаға көшіп кетті. Қалада баспана жалдап тұрады. Енді не істейді?! Ауылда тұрғымыз келеді. Бірақ жұмыс жоқ. Мектеп жабылды. Балаларды оқыта алмай қалдық. Тіпті, мал ұстайын десең жан-жаққа егін егіп тастаған. Жайылым жер де жетпейді. Қазақстанда 2025 жылы 83 елдімекеннің атауы өшірілді. Олардың 80 пайызы солтүстік өңірлердегі ауылдар екен. Яғни, Солтүстік Қазақстан, Ақмола мен Павлодар облыстарында ғана 68 ауыл жабылған. Бұл елдімекендерде халық саны елу адамға да жетпейді. Ал қоғам белсендісі Қайрат Дүйсенбі урбанизация Тәуелсіздік алған жылдары жекешелендіруге көшкен сәттен басталды дейді. Халық жұмыссыз қалғандықтан жұрт жайлы өмір іздеп ауылдан кетті деп отыр. Ол жағдайды қалыпқа келтіру үшін ауыл шаруашылық саласын дамытып, жұрттың кәсіп бастауына қолдау көрсету керек деген пікірде. ҚАЙРАТ ДҮЙСЕНБІ, қоғам белсендісі: Ауылда тұрақты жұмыс жоқ. Бірінші себеп. Баяғы совхоздардың орнын басатын орын табылмады. Енді Үкіметтің саясатын былай талдап қарап жатсақ, бәрі ауылға барады. Дипломмен ауылға деп жатыр. Бірақ іс жүзінде бәрі керісінше. Қазір жастар ауылға алтын берсең де бармайды. Себебі, өмірдің бәрі оқу да, жұмыс та қалада. Ауылда ешқандай жағдай жоқ. Ал, әлеуметтанушылар қандастар мен оңтүстіктен көшіп келген азаматтарды жергілікті билік инфрақұрылымы тозған, мектебі жоқ, тіпті таза ауыз су тартылмаған ауылдарға бағыттайды. Сол себепті халық та ол аумақта ұзақ тұрақтамай, кері қайтып жатыр деп қынжылады. Айта кетейік, Тәуелсіздік алған жылдардан бері екі мыңға жуық ауыл біржолата жойылған екен. #Информбюро #31арна #БастыЖаңалықтар #Новости #31канал