Tula 👏🏻 "ANG BATO" ni Jose Corazon de Jesus скачать в хорошем качестве

Tula 👏🏻 "ANG BATO" ni Jose Corazon de Jesus

Tapakan ng tao sa gitna ng daan, kung matalisod mo'y iila-ilandang; ngunit, pagkatapos pag ikaw'y namatay, bato, ang tatapak sa bangkay mo naman!" – Tula ni Jose Corazon de Jesus. Binigkas ni Bert Cabual, batikang makata, mambabalagtas, manunulat, brodkaster at guro buhat sa Batangas. Kasalukuyan siyang naninirahan sa London. ANG BATO ni Jose Corazon de Jesus Tapakan ng tao sa gitna ng daan, kung matalisod mo'y iila-ilandang; ngunit, pagkatapos pag ikaw'y namatay, bato, ang tatapak sa bangkay mo naman! Batong tuntungan mo, sa pagkadakila, batong tuntungan ko sa pamamayapa; talagang ganito. . . sa lapad ng lupa ay bali-baligtad lamang ang kawawa. Balot pa ng putik, marumi't maitim, tinapyas at aba!... brilyanteng maningning... Sa putik man pala ay may bituin din na hinahangaan ng matang titingin. Maralitang tao, batong tinapon sa lusak ng palad ay palabuy-laboy... Nag-aral at aba!... noong makaahon, sa mahirap pala nar'on ang marunong! Ang batong malaki'y madaling mabungkal, ang batong brilyante'y hirap matagpuan; Ubos-laking tipak, mura ng matimbang, ga-mata ng isda'y pagkamahal-mahal, At tunay nga naman! Madalas mamalas sa alimasag man, ang malaki'y payat; may malaking kahoy ay sukal sa gubat may mumunting damong ang ugat ay lunas. Ang bato sa ilog, gayon, tingnan mo ba! Batong nasa agos, makinis, maganda... Batong nasa gilid, bahay ng talaba, sadlakan ng dumi at nilulumot pa! O, batas ng buhay! Ang ayaw kumilos, habang tumatanda'y lalong nilulumot... Kung agos ng palad, ang takot sa agos, malayong matutong maglangoy sa ilog. Tatlong tungkong bato, pinagtuwang-tuwang, nang makaluto ka ng kanin sa kalan; Mapurol mong kampit at gulok na bingaw napatatalas din ng batong hasaan. Sa tao - ang bato - aklat ang kapara, ang talim ng isip, tabak ang kagaya... Hasa ka nang hasang sumulat-bumasa, bukas-makalawa'y magiging pantas ka. Kapag nagkapingki, bato mang malamig, may talsik ng apoy na sumasagitsit; Ang noo ng tao, kapag nagkakiskis, apoy ng katwiran ang tumitilansik. At saka ang bato ay may katarungan, taong nilulunod na bato ang pataw; Kung taong masama, di na lumulutang, kung taong mabuti'y pumapaibabaw. Tatlong batong munti, kahit mo luglugin sa loob ng bote'y nagtutugtugan din... May mumunting bagay na kahit dikdikin... ang iginagati'y awit at taginting... Maliit na batong sa bote'y nasilid, lalong kumakanta, habang nililiglig; Katulad ng isang nahuling kuliglig habang pinipindot, lalong umaawit. Batong palamuti sa singsing ng kamay, madalas uriin, ayon sa may taglay; Puwit man ng baso't suot ng mayaman, ang isip ng tao'y brilyanteng makinang. Batong magdaraya, "batong parakale" mayabang na batong "mawala'y di-bale" marami ring ganyang babae't lalaki, ibig magmayaman, bago ay pulubi. At makikita mo, saan man paroon itong buong mundo'y may batong katugon; Ang labindalawang buwan ng santaon labindalawa ring kulay ng panahon. Ang luntiang daho'y naging "esmeralda't" ang langit na bughaw ay naging "turkesa;" kapatak ng dugo ay "rubing" mapula, saka ang "brilyante'y" luha ng dalaga. Libu-libong taong sa ilang naglakbay, inabot ng uhaw, walang mainuman; kaya't ang ginawa ni Moises, nagdasal... pinukpok ang bato, tubig ang bumukal. Nang unang panahong wala pang papiro, ang bato ang aklat ng mga Ebreo. Batas, tula't awit nilimbag sa bato, at tinatandaan ng magdaang tao. Kung kaya ang bato kahit saang pook laruan kung sintak, bantilan kung siklot; Hiyas, tulay, hagdan, bahay, tore, moog, daming nagagawa gayong kakarampot. Bato ang korona ng Hari sa trono, bato ang sabsaban na duyan ni kristo, bato ang lapida sa hukay ng tao... Itong mundo pala'y sandakot na bato!... At ayon sa sabi, bato'y may samyo raw, kahit mo itago ay maaamuyan; Kabang nakasusi, may batong makinang, naamoy ng tekas, biniyak ang kaban. Sa kislap ng bato, kay-raming nadaya, dami ng dalagang sa bato nasira; malinaw mang mata ay kinukulaba!... dahilan sa hiyas, napapariwara!... Ano ba't ang mundo, tuwi kong titingnan, parang isang batong napulot sa ilang; kung gabi'y madilim, kung araw, makinang sa singsing ng Diyos, doon napalagay! At habang ang tao'y hindi makapayag, magsuot ng singsing ng sariling palad; sa kamay ng Diyos, bato'y binabakbak, ang tapyas ng mundo nama'y nagagasgas! . . . #spokenword #poetry #tagalog