កម្វុជក្សត្រដែលមានព្រះនាម ឥន្ទ្រវម៌្ម (Indravarma) скачать в хорошем качестве

កម្វុជក្សត្រដែលមានព្រះនាម ឥន្ទ្រវម៌្ម (Indravarma)

1-ព្រះអង្គម្ចាស់ស្រីឥន្ទ្រាយុទ្ធ ព្រះអង្គជារាជបុត្រាមួយអង្គរបស់ព្រះបាទជយវម៌្មទី២ ដែលសោយរាជ្យចាប់ពីឆ្នាំ៨០២-៨៣៥ នាដើមសម័យអង្គរ ពោលគឺត្រូវជាព្រះអនុជរបស់ព្រះបាទជយវម៌្មទី៣ ដែលសោយរាជ្យចាប់ពីឆ្នាំ៨៣៥-៨៧៧។ ព្រះអង្គម្ចាស់ស្រីឥន្ទ្រាយុទ្ធ ជាអ្នកខ្លាំងពូកែខាងសឹកចម្បាំង ហើយបានធ្វើសង្គ្រាមឈ្នះលើកងទ័ពចាម្ប៍ និងក្រុមបះបោរនៅភូមិភាគជាប់នឹងប្រទេសចាម្ប៍។ តាមសៀវភៅដែលមានចំណងជើងថា ប្រាសាទព្រះវិហារ របស់លោកសាស្ត្រាចារ្យ រស់ ចន្ត្រាបុត្រ បានឱ្យដឹងថា នៅពេលឈានដល់វ័យចំណាស់ ព្រះស្រីឥន្ទ្រាយុទ្ធបានយាងទៅធ្វើសមាធិនៅទីតាំងប្រាសាទព្រះវិហារបច្ចុប្បន្ន ដែលដើមឡើយ មិនទាន់មានការកសាងប្រាសាទនៅឡើយទេ គ្រាន់តែមានជាអាស្រមធ្វើអំពីឈើប៉ុណ្ណោះ។ ព្រះអង្គក៏បានយកលិង្គថ្មធម្មជាតិដ៏ធំមួយទៅតម្កល់នៅទីនោះ និងបានប្រសិទ្ធនាមថា ស្រ៊ីស៊ិខារេស្វារ៉ា ឬ ស្រីសិខារេស្វរៈ។ យោងតាមសិលាចារឹកប្រាសាទបាភួន K.583 ក៏បានឱ្យដឹងថា ព្រះស្រីឥន្ទ្រាយុទ្ធ ជាក្សត្រដែលខ្លាំងពូកែអាចច្បាំងយកជ័យជម្នះលើស្តេចចាម្ប៍ ទ្រង់​បាន​​យកលិង្គថ្មធម្មជាតិមួយឈ្មោះ ស្រីសិខារេស្វរ មកតាំងប្រតិស្ឋាននៅទីតាំងដើមនៃប្រាសាទ​ព្រះវិហារ។ ឯកសារខ្លះថា ទ្រង់បាននាំយកព្រះសិវលិង្គស្រីសិខារេស្វរ និងស្រីភទ្រេស្វរ ពីលិង្គបវ៌្វត ដែលជាភ្នំនៅក្បែរប្រាសាទវត្តភូ ប្រទេសឡាវបច្ចុប្បន្ន មកតម្កល់នៅភ្នំព្រះវិហារនេះដំបូងបង្អស់ ពោលគឺមុនការកសាងប្រាសាទព្រះវិហារ នារជ្ជកាលព្រះមហាក្សត្រក្រោយៗទៅទៀត។ 2-ព្រះបាទស្រីឥន្ទ្រវម៌្មទី១ ព្រះអង្គគឺជាព្រះមហាក្សត្រដែលសោយរាជ្យចាប់ពីឆ្នាំ៨៧៧-៨៨៩ នៅរាជធានីហរិហរាលយ គឺនៅតំបន់រលួស ខេត្តសៀមរាបបច្ចុប្បន្ន។ ព្រះបាទឥន្ទ្រវម៌្មទី១ ព្រះបិតារបស់ទ្រង់មានព្រះនាម ប្ឫថិវីន្ទ្រវម៌្ម ហើយព្រះមាតាមានព្រះនាម ប្ឫថិវីន្ទ្រទេវី ខណៈព្រះមាតាទ្រង់គឺជាប់ព្រះញាតិវង្សនៅពលាទិត្យបុរ ឬអនិន្ទិតបុរ ដែលទំនងជានៅម្ដុំតំបន់ប្រាសាទសំបូរព្រៃគុក ខេត្តកំពង់ធំ ក្បែរអតីតរាជធានីឦសានបុរដែរ។ ព្រះបាទឥន្ទ្រវម៌្មទី១ ត្រូវជាបងប្អូនជីដូនមួយនឹងព្រះបាទជយវម៌្មទី៣ ដែលជាព្រះមហាក្សត្សអង្គមុន។ កាលមិនទាន់ឡើងគ្រងរាជ្យ ព្រះបាទឥន្ទ្រវម៌្មទី១បានរៀបអភិសេកជាមួយព្រះនាងឥន្ទ្រទេវី (ទី១) និងមានបុត្រាបុត្រីចំនួន៣អង្គ គឺព្រះនាងមហេន្ទ្រទេវី ព្រះបាទយសោវម៌្មទី១ និងព្រះនាងជយទេវី (ទី២) (ដែលជាព្រះមហេសីរបស់ព្រះបាទជយវម៌្មទី៤)។ ក្នុងឆ្នាំឡើងគ្រងរាជ្យដំបូងនាឆ្នាំ៨៧៧នោះ កិច្ចការដំបូងរបស់ព្រះបាទឥន្ទ្រវម៌្មទី១ គឺការជីកបារាយណ៍ខាងត្បូង ឬបារាយណ៍លលៃ ដែលឈ្មោះដើមហៅថា ឥន្ទ្រតដាក ដែលបច្ចុប្បន្នជាប់នឹងផ្លូវជាតិលេខ៦ តែរីងស្ងួតអស់ទៅហើយ។ បន្ទាប់មក ពោលគឺនៅឆ្នាំ៨៧៩ ព្រះអង្គបានកសាងប្រាសាទព្រះគោ ដែលឈ្មោះដើមហៅថា ស្រីបរមេស្វរ ដើម្បីឧទ្ទិសដល់បុព្វការីជនរបស់ទ្រង់ (ខ្ញុំនឹងជម្រាបពីចំណុចពិសេសនៃការកសាងប្រាសាទព្រះគោនេះនៅពេលក្រោយ)។ បន្តមកទៀត គឺនៅឆ្នាំ៨៨១ ព្រះអង្គបានកសាងប្រាសាទរាជ្យដ៏ធំដំបូងគេមួយ គឺប្រាសាទបាគង ដែលដើមឡើយមានឈ្មោះហៅថា ស្រីឥន្ទ្រេស្វរ ដែលសុទ្ធតែជាប្រាសាទល្បីៗនៅរាជធានីហរិហរាលយ។ នារជ្ជកាលរបស់ព្រះបាទឥន្ទ្រវម៌្មទី១ កម្វុជទេសមានសន្តិភាពពេញបរិបូរណ៍ អំណាចរបស់ព្រះអង្គបានលាតសន្ធឹងរហូតដល់សមុទ្រនៅភាគខាងត្បូង ក្នុងនោះគេឃើញមានប្រាសាទមួយនៅភ្នំបាយ៉ង់កោ ខេត្តតាកែវ ដែលត្រូវបានកសាងឡើងក្នុងរជ្ជកាលព្រះអង្គ។ នៅខាងជើង រាជអំណាចរបស់ទ្រង់បានលាតសន្ធឹងទៅហួសខេត្តឧត្បាលរាជធានី ប្រទេសថៃសព្វថ្ងៃ តាមរយៈប្រាសាទពុទ្ធនិយមមួយ ដែលត្រូវបានកសាងឡើងនៅឆ្នាំ៨៨៦ និងសិលាចារឹកនៅទីនោះ ដែលបញ្ជាក់ពីរាជអំណាចរបស់ទ្រង់ដែរ។ 3-ព្រះនាងឥន្ទ្រទេវី (ទី១) ព្រះនាងជាព្រះរាជអគ្គមហេសីរបស់ព្រះបាទឥន្ទ្រវម៌្មទី១ (៨៧៧-៨៨៩) ដូច្នេះព្រះនាងគឺជាព្រះម្ចាស់ក្សត្រី ឬព្រះមាតាជាតិមួយអង្គដែរ នាដើមសម័យអង្គរនោះ។ ចំពោះសាវតារាជវង្ស ព្រះនាងឥន្ទ្រទេវីជារាជបុត្រីរបស់ព្រះបាទមហិបតីវម៌្ម ជាក្សត្របុរីនៅសម្ភុបុរ និងព្រះនាងរាជេន្ទ្រទេវី (ដូចបានជម្រាបរួចមកហើយនៅវីដេអូមុនៗ) ឬអាចនិយាយបានថា ព្រះនាងជារាជបុត្រមកពីសម្ភុបុរ។ បើតាមប្រវត្តិសាស្ត្រនាចុងសម័យចេនឡា កងទ័ពជ្វានៃចក្រភពស្រីវិជយបានចូលឈ្លានពានលុកលុយចេនឡាខាងក្រោម ដោយបានវាយចូលដល់រាជធានីសម្ភុបុរ ដែលកំពុងគ្រងរាជ្យដោយព្រះបាទមហិបតីវម៌្ម ព្រះបិតារបស់ព្រះនាងឥន្ទ្រទេវីនេះឯង ហើយបានដុតបំផ្លាញទីក្រុងនិងរាជវាំង ឆក់ប្លន់ទ្រព្យសម្បត្តិនិងកាប់សម្លាប់ប្រជារាស្ត្រខ្មែរ ធ្វើគុតព្រះរាជាសម្ភុបុរ គឺព្រះបាទមហិបតីវម៌្ម ហើយថែមទាំងកៀរយករាជវង្សានុវង្ស និងប្រជារាស្ត្រខ្មែរទៅកាន់កោះជ្វាផងដែរ រហូតដល់មានការនិទានរបស់ពួកឈ្មួញអារ៉ាប់ថា ព្រះបាទជយវម៌្មទី២ ក៏ត្រូវជ្វាកៀរជាឈ្លើយយកទៅកោះជ្វាផងដែរ ក្រោយមកក៏បានត្រឡប់មកស្រុកខ្មែរវិញ និងបានរំដោះប្រទេសជាតិឱ្យរួចពីចំណុះរបស់ចក្រភពស្រីវិជយ។ 4-ព្រះរាជបុត្រាស្រីឥន្ទ្រាទិត្យ ព្រះអង្គជាព្រះរាជបុត្ររបស់ក្សត្របុរ ឬស្ដេចត្រាញ់ត្រួតនៅភវបុរ ក្នុងរជ្ជកាលព្រះបាទយសោវម៌្មទី១ ព្រះបាទហស៌វម៌្មទី១ ព្រះបាទឦសានវម៌្មទី២ និងព្រះបាទជយវម៌្មទី៤។ រាជបុត្រាស្រីឥន្ទ្រាទិត្យ រួមជាមួយរាជមន្ត្រីរបស់ទ្រង់ឈ្មោះ ធម៌្មាទិត្យ បានធ្វើតង្វាយដល់ទេវស្ថាន ស្រីត្រិបុរាន្តកេស្វរ ដែលបច្ចុប្បន្នអ្នកស្រុកហៅថា ប្រាសាទអំពិលរលំ ឬប្រាសាទបី។ គេស្គាល់ឈ្មោះរបស់រាជបុត្រអង្គនេះ តាមរយៈសិលាចារឹកប្រាសាទអំពិលរលំ K.162។ សូមជម្រាបថា ប្រាសាទអំពិលរលំ ឬប្រាសាទបី បច្ចុប្បន្នស្ថិតនៅភូមិអណ្ដូងត្រុំ ឃុំចំណារលើ ស្រុកស្ទោង ខេត្តកំពង់ធំ។ 5-ព្រះនាងឥន្ទ្រលក្ស្មី យោងតាមសិលាចារឹកប្រាសាទព្រះឥន្ទ្រកោសីយ៍ ខេត្តសៀមរាប បានឱ្យដឹងខ្លះថា ព្រះនាងឥន្ទ្រលក្ស្មីជារាជបុត្រីរបស់វ្រះបាទធូលីជេងវ្រះកម្រតេងអញស្រីរាជេន្ទ្រវម៌្មទេវ គឺព្រះបាទរាជេន្ទ្រវម៌្មទី២ (៩៤៤-៩៦៨) បានន័យថា ព្រះនាងជាប្អូនស្រីរបស់ព្រះបាទជយវម៌្មទី៥ (៩៦៨-១០០២)។ សិលាចារឹកដដែលបានឱ្យដឹងទៀតថា ព្រះនាងឥន្ទ្រលក្ស្មីបានរៀបអភិសេកជាមួយព្រហ្មណ៍ទិវាករភដ្ដ ដែលជាបណ្ឌិតមួយរូបក្នុងរជ្ជកាលព្រះបាទជយវម៌្មទី៥ ហើយក៏ជាអ្នកកសាងប្រាសាទព្រះឥន្ទ្រកោសីយ៍នេះផង។ #history #king #angkor #angkorwat #cambodia #siemreap #phnompenh #queen #culture #civilization