ပို့ချစဉ်-၁ скачать в хорошем качестве

ပို့ချစဉ်-၁

ကျမ်းပြုဆရာတော် အရှင်အနုရုဒ္ဓါမထေရ်၏ ရတနတ္တယ ပဏာမနှင့် ပဋိညာဉ် သမ္မာသမ္ဗုဒ္ဓမတုလံ၊ သသဒ္ဓမ္မဂဏုတ္တမံ။ အဘိဝါဒိယ ဘာသိဿံ၊ အဘိဓမ္မတ္ထသင်္ဂဟံ။ အဟံ - အကျွန်ုပ်သည်၊ အတုလံ - ပြိုင်ဘက်ရည်တူ ရှိတော်မမူထသော၊ သသဒ္ဓမ္မဂဏုတ္တမံ - သုံးပါးသော သဒ္ဓမ္မ, မြတ်သောအရိယာဂိုဏ်းနှင့် တကွလည်း ဖြစ်တော်မူထသော၊ သမ္မာသမ္ဗုဒ္ဓံ - မြတ်စွာဘုရားကို၊ (အဘိ၀န္ဒာမိ - အန္တရာယ်ကင်းပျောက် ကျမ်းပြီးမြောက်ဖို့ ချီးမြှောက်ထောမနာ လွန်စွာကြည်နူး အထူးအားဖြင့် ရှိခိုးပါ၏၊) အဘိဝါဒိယ - အန္တရာယ်ကင်းပျောက် ကျမ်းပြီးမြောက်ဖို့ ချီးမြှောက်ထောမနာ လွန်စွာကြည်နူး အထူးအားဖြင့် ရှိခိုးပြီး၍၊ အဘိဓမ္မတ္ထသင်္ဂဟံ- အဘိဓမ္မာ ဒေသနာ၏ လွန်စွာကျယ်ဝင်း အနက်ရင်းကို အကျဉ်းချုံးကာ သိမ်းယူရာ၏ အဖြစ်ကြောင့် အဘိဓမ္မတ္ထ သင်္ဂြိုဟ် ခေါ်ဆိုလက်သန်း အဋ္ဌကထာကျမ်းကို၊ ဘာသိဿံ - မိန့်ဆိုတည်ထွင် စီရင်ပေအံ့။ #ပါဠိစာလုံးဆင့်_ဖတ်နည်း ၁။ နှစ်လုံးဆင့်မှာ၊ အထက်သာ၊ သတ်ပါမြဲဧကန်။ ၂။ သဝေလည်းထိုး၊ တ-သတ်မျိုး၊ ဖတ်ရိုး စ-သတ်သံ။ ၃။ သဝေလည်းထိုး၊ န-သတ်မျိုး၊ ဖတ်ရိုး င-သတ်သံ။ ၄။ သဝေရေးချ၊ သတ်မြင်က၊ မှတ်ကြ ၀-ဆွဲသံ။ ၅။ ဟ-ထိုး ၀ဆွဲ၊ ရရစ် ယပင့်၊ တွေ့လျင်းက၊ နှစ်၀တာဝန်၊ ကျေပွန်စေရန်၊ အသံအသတ်၊ ယူမြဲမှတ်။ ၁။ နှစ်လုံးဆင့်မှာ၊ အထက်သာ၊ သတ်ပါမြဲဧကန်။ အက္ခရာနှစ်လုံးဆင့်တွေ့လျှင် အပေါ်တွင်ရှိသော အထက်အက္ခရာကို အသတ်တင်၍ ဖတ်ရမည်။ ဥပမာ = သောမနဿ = သောမနသ်သ (သောမနက်သ) ဒုက္ခ = ဒုက်ခ သင်္ခါရ = သင်ခါရ သမန္တာ = သမန်တာ စက္ကဝါဠေသု = စက်ကဝါဠေသု ဂစ္ဆန္တု = ဂစ်ဆန်တု အညမည = အဉ်ညမဉ်ည (အင်ညမင်ည) ၂။ သဝေလည်းထိုး၊ တ-သတ်မျိုး၊ ဖတ်ရိုး စ-သတ်သံ။ သဝေထိုးနှင့်တွဲသော တ-သတ်ကို စ-သတ် အသံထွက်၍ ဖတ်ရမည်။ (က, ဂ, ပ-သတ်များလည်း နည်းတူပင်) ဥပမာ = မေတ္တာ = မေတ်တာ (မစ်တာ) ခေတ္တ = ခေတ်တ (ခစ်တ) ဩဘာသေတွာ = ဩဘာသေတ်တွာ (အောဘာသစ်တွာ) လောကဇေဋ္ဌံ = လောကဇေဋ်ဌံ (လောကဇစ်ထံ) ဥပေက္ခာ = ဥပေက်ခါ (ဥပစ်ခါ) သေက္ခ = သေက်ခ (သစ်ခ) ဖေဂ္ဂု = ဖေဂ်ဂု (ဖစ်ဂု) ၃။ သဝေလည်းထိုး၊ န-သတ်မျိုး၊ ဖတ်ရိုး င-သတ်သံ။ သဝေထိုးနှင့်တွဲသော န-သတ်ကို င-သတ် အသံထွက်၍ ဖတ်ရမည်။ ဥပမာ = ပူရေန္တံ = ပူရေန်တံ (ပူရင်တံ) ဝိနာသမေန္တု = ဝိနာသမေန်တု (ဝိနာသမင်တု) ၄။ သဝေ ရေးချ၊ သတ်မြင်က၊ မှတ်ကြ ၀-ဆွဲသံ။ သဝေထိုးရေးချကို ၀-ဆွဲ အသံထွက်၍ ဖတ်ရမည်။ ဥပမာ = ဟောန္တု = ဟောန်တု (ဟွန်တု) သောတ္ထိ = သောတ်ထိ (သွတ်ထိ) ပေါဋ္ဌိလ = ပေါဋ်ဌိလ (ပွတ်ဌိလ) ၅။ ဟ-ထိုး ၀ဆွဲ၊ ရရစ် ယပင့်၊ တွေ့လျင်းက၊ နှစ်၀တာဝန်၊ ကျေပွန်စေရန်၊ အသံ-အသတ်၊ ယူမြဲမှတ်။ ဟထိုးနှင့်တွဲသော မ-အက္ခရာသည် အသတ်တာဝန်ကိုလည်း ယူရသည်၊ မိမိ၏ မူလဗျည်း အသံလည်း ထွက်ရသည်။ အသတ်နှင့် အသံတာဝန်နှစ်မျိုးကို ယူရသည်။ ဥပမာ = အမှ = အမ်မှ တုမှ = တုမ်မှ ၀ဆွဲနှင့်တွဲသော တ-အက္ခရာသည် အသတ်တာဝန်ကိုလည်း ယူရသည်၊ မိမိ၏ မူလဗျည်းအသံလည်း ထွက်ရသည်။ အသတ်နှင့် အသံတာဝန်နှစ်မျိုးကို ယူရသည်။ ဥပမာ = ကတွာ = ကတ်တွာ ဟုတွာ = ဟုတ်တွာ ရရင့်ပုံစံ = အတြ = အတ်တရ တတြ = တတ်တရ ယပင့်ပုံစံ = သကျ = သက်ကျ နိယျာနိကံ = နိန်ယာနိကံ မှတ်ချက်။ ။“ဥပ္ပဇ္ဇေယျ”စသော ကြိယာပုဒ်များကို အထက်ပါအတိုင်း အသံမထွက်ရပါ။ “ဥပ္ပဇ္ဇေယျ = ဥပ်ပစ်ဇေယျ”ဟုသာ အသံထွက်ရမည်။