快必講耶穌： 2022年8月28日週日講章 скачать в хорошем качестве

快必講耶穌： 2022年8月28日週日講章

"代快必講耶穌" 作為基督徒、傳道人，快必以前喺路小教會、眾樂教會，都會周不時講吓耶穌！上船之後佢每個禮拜日，都會寫一篇週日講章。由於佢嘅講章太有個人風格，擔心未能好好詮釋佢嘅講道，所以一直都冇錄音。不過有朋友表示有上YouTube冇去Facebook，一直緣慳一面。今次嘗試錄一篇，同大家分享，反應好嘅話，有機會會再錄。其實，大家亦都可以上快必嘅Patreon，免費瀏覽，當然大家亦都可以繼續點點滴滴，支持快必嘅Patreon。多謝大家先。 快必講耶穌： 2022年8月28日週日講章 【用悟性看出人生之相反、倒轉和錯置】 上個主日，我哋睇過法律之無能，今個主日，我哋講返啲人生哲理、存在之道。道，可以係道家老子的「道可道，非常道」嗰啲道，同基督信仰「太初有道，道成肉身」有對話之可能，今日我作此嘗試。 今日嘅福音，係路加福音14章1至14節，我哋又會睇希伯來人嘅智慧，記載箴言25篇6至7節，希伯來人即猶太人，佢哋處世智慧好豐富，有本預言書叫while standing on one foot［當你單腳站立時］，呢本書好好睇，我大姨甥女細個嘅時候成日叫我同佢講嘅床邊故事，同一個故事講咗幾十次。當小朋友仲想聽你講故事的時候，要珍惜同佢相遇的時間，回憶是渡過苦難的良藥。佢以為我「文字獄」坐到11月22號出嚟之後，就可以參加佢兩年後嘅High School畢業。我話不如大學畢業先來啦，好傷感，一個小妹妹聽舅父講Bedtime story，之後再見已經係大學畢業了。有好多「35+」的政治犯囚友，老婆生仔陪唔到，出去嘅時候，個細路識行識走，就快讀小學了，傷感。又有啲送唔到家人最後一程，也很心痛，不足為外人道。法律之無能，被邪惡操縱、踐踏，被釘十字架的人，流血流淚，耶穌來，不是挑戰律法，而是成全律法，把律法精神實踐出嚟，律法精神所謂法治精神，不是邪惡政權認為的「守法」、「聽話」、「乖」、「唔好激嬲有公權力的人」，法治精神係以法達意，以法限權，用宗教語言，有公權力的人不是有權用盡，不是以法律去整治他人，使人收聲收皮，用宗教語言說權力是為了「恩惠、憐憫、公義」。法律是為了「恩惠憐憫公義」而不是「打壓異己、消滅人性、甚至不是為了政權安全」。這是扭曲了的法律，你睇吓天主教的聖詠112篇點講。 安息日的法律係為釋放人，釋放眾生、萬物同大地，但一旦法律、無能的法律用在無所制約的權力之人手上的時候，它就成為了迫害人的工具，路加福音14章1至14節，又係安息日，耶穌去到一個宗教領袖屋企食飯，因為有咗上個禮拜醫治駝背女人的經歷，耶穌見到有個患水臌的人（現化人說法：肝硬化腹水），係宗教領袖又安排咗來挑機的。耶穌問個宗教領袖，問佢安息日醫病，可唔可以？宗教領袖不發一言，收咗皮。耶穌醫好嗰個人，再寸班契弟「你哋如果有隻牛、或者驢，喺安息日跌咗落個井入面，你哋會唔會因為安息日而唔救佢呢？」好正路的真話，孺子入井，路人見到，就算唔識都會救佢。因為這是最正路、最基本的，律法寫在人心、良知入面，其實係咁。但良心很脆弱，很不可靠，非法獲得權力，以暴力獲得權力的人，會話自己最有為國為民的心，不需要制度上的權力制衡，不是只有西方那一套才是普世價值，你有你的，我有我的，這才是多元，才是尊重，喔喔喔。放在現今世界，我講嘅係俄羅斯同北韓囉！耶穌講真話講正常嘢，所以要死，要好似奴隸一樣被釘死在十字架上，當時羅馬公民是不會釘十字架死的，會斬首，聖保羅就係咁樣殉道的。 今日的故事繼續發展，寸完可以再寸，耶穌真係好Q寸，我很想效法做市井之徒，目無法紀，視惡法如無物！佢見到有賓客揀個主家席上位坐，就講「為客之道」同埋稍後「主家請客之道」，個故仔好有趣。耶穌寸嗰個坐高位的客人，話：「好心啲人謙虛啲，去人哋嘅飲宴，自己揀個最低微嘅位坐，等主人家請你坐高位，總好過自己戇99坐住個高位，一陣人哋主人家叫你坐返去山頂啦，呢個位唔係你坐㗎， thank you ！咁就自己面懵懵了。」即係「回魂夜」周星馳話齋「架，係自己攞嚟丟嘅！」呢個故仔好有寓意，一個寓意係叫人有自知之明，要謙虛一啲，另外一個係我一開始話今日嘅福音故事，可以同道家對話的原因。老子我幾個月前睇過，如今仍記在心中。22章「曲則全，枉則直，窪則盈，敝則新，少則得，多則惑。」那對比是委曲反能保存，屈就反能伸展，低窪反能充盈，敝舊反能新生，少取反能多得，貪多反而迷惑，這不也是福音故事裏的你自己坐在主人家席位上，反而被叫返落嚟，不如你自謙坐在末席，被奉為上賓好過啦，咁咩？老子又說聖人「不自見故明，不自是故彰，不自伐故有功，不自矜故長。」不自我表揚，反而能顯達；不自以為是，反而能彰顯；不自己誇耀，反見其功效；不自我矜誇，反而能持久。在24章，老子說「企者不立，跨者不行，自見者不明，自是者不彰，自伐者無功，自矜者不長。」呢度，我只翻譯頭兩句，即係踮起腳筋企一定企得唔耐，唔太穩固！大大步跨步前進，當然易攰行得唔遠啦。所以自謙自卑，反而可以長遠持久並受人尊敬。再看一段好嗎？老子36章「將欲歙之，必固張之；將欲弱之，必故強之；將欲廢之，必故舉之；將欲取之，必故與之，是謂微明。」這段文字被後人誤解為陰謀之道，第一個曲解的是韓非子，老子原意是「將要收劍的，必先擴張；將要削弱的，必先強盛；將要廢棄的，必先興舉；將要取去的，必先給予，這些都是事物的先兆。」老子想說的，是萬事萬物都在發展中，不斷在轉化狀態，當事物發展到某一個極限時，它便會朝向相反方向運轉，像物極必反或否極泰來的理念，花開花落月圓月缺。若用陰謀論去看，就變成你想別人把你捧上高位嗎？那你就要以退為進，先說成自己很不在乎，扮謙虛，坐在末後的位置上，等人把你叫去上賓的位置，那你的陰謀便成功了！中國歷史上大把這些故事，所以我對這個民族這些作為是嫌棄和認為冇得救的。但原來這種誤解，西方文明也有。尼采曾說，耶穌的門徒是假謙虛，他們去坐末席的位置，就是為了被人請上首位；他們是假慷慨，他們在現世受苦，殉道就是為了來世的賞賜，這種來世觀是扭曲的，韓非與尼采有同一種陰謀論和犬儒的想法。 其實，耶穌這段話是借用猶太人的古老智慧，像老子一樣古老的智慧，在箴言25章6、7節，「不要在王面前妄自尊大，不要在大人的位上站立，寧可有人說，請你上來，強如在你覲見王子面前，叫你退下。」箴言25章6、7節，耶穌當時同啲宗教領袖食飯，係借用咗佢哋祖先希伯來人呢段教訓，我哋今日都睇到。但我覺得耶穌不只是教人謙虛，而是想講佢自己的身份，也不是他自稱自己係一個謙虛的人，雖然以倒空自己、謙卑自己來說，基督認咗第二都冇人認第一了。聖保羅寫俾腓立比教會的信，腓立比書2章5至11節，有段所謂「基督虛己論」，他本有上主的形象卻反倒虛己，以奴僕的形象成為人的樣式而非神的強橫形象，仲卑微順服，以至於死，且死在十字架上，這是基督由上而下的作為。接着聖保羅說，去到死咁低賤的基督，上主將佢倒轉成為至高，叫天上地上一切都稱佢為主，歸榮耀予聖父。呢段嘅神學，正正是今日路加福音14章耶穌講句自己，像一個去飲宴的人，坐到最低的位置，主家將佢請到主家席上，奉為上賓。而恰恰嗰個宗教領袖，在社會地位操弄民眾等事情上，以為是坐在首席，其實，佢哋反而將要被放在末席上，而且審判，不是在世界末日才發生，而是在那時已經發生。因為基督已經在他們當中，而且要死於他們之手，可以話是他們自己做了一些事去審判他們自己。 像我們這個邪惡的世代，邪惡的人審判無辜者，無辜者飽受冤案冤獄之苦，人心看得清楚，不用在等待什麼歷史公論。我們看到的是那些靠攏權貴的戴假髮演員，辯不過鄒幸彤，辯不過咁戴啟思、吳靄儀、李志喜、潘熙以及不少大狀，但它們與權勢沆瀣一氣，無辜者就如耶穌和祂的門徒一樣被枉屈。靠攏權貴戴假髮的演員，我稱呼佢哋DOJack，用書面語禮貌地講叫混蛋，像我這種市井之徒，會叫佢哋係仆街冚家剷。它們是正義的，一定係除非唔係，我們一定是有罪的，這種對調錯置，就像今日福音講嘅上位、末座的對調和錯置。基督也如罪犯一樣被釘死在十字架上，而宣判佢有罪的就是羅馬人的department of justice, 是猶太人的department of justice，係so called “justice”。我們抗議，我們要認清那種相反，那種倒轉，那種錯置。耶穌的講道有好多呢啲相反、倒轉和錯置的，例如在前的將要在後，在後的將要在前；凡因基督之名捨棄生命的，反而得着生命；那些以為自己可以保存生命的，反而喪掉生命；煩自卑的必升為高，自高的必降為卑。這些相反、錯置，也是人生的無常、張力和Dynamics，一種動力。 教會作為一個效法基督的群體，一個公民社會的組成部份，請人食飯唔好請啲可以回報你的朋友弟兄親屬和富足的鄰舍。但係有啲教會就要搵啲有錢信徒加入佢哋嘅教會，等有錢信徒奉獻多啲啦；奉獻多咗，又可以起大啲個教堂，又再收多啲有錢信徒。耶穌話你擺設筵席，要請咩人呀？窮嘅、殘廢嘅、跛嘅、盲嘅，唔係叫你去深水埗派飯俾露宿者啊，係叫你請佢地去你擺設嘅筵席啊，邊有人會咁做？邊有教會會咁做？其實係叫教會的倫理問「點樣可以使整個社會，變成一個大家庭，可以歡迎接待嗰啲窮嘅、殘廢嘅、跛嘅、盲嘅，成為一個友愛社區啊？唔係選舉嗰陣時做show，更加唔係嗰啲心靈雞湯式激勵人正能量嘅電視節目呀！兩者同樣是令人政治式作嘔。 最後我想講嗰個窮嘅、殘廢嘅、跛嘅、盲嘅，其實係基督自己。呢個可能係我回應神義論theodicy的其中一小個答案。我追隨的基督，係一個窮嘅、殘廢嘅、跛嘅、盲嘅、無能嘅，就好似奴隸一樣，被處死在十字架上的政治犯。而嗰啲大能嘅、正義嘅，合法嘅，有槍嘅，戴假髪嘅、開新篇嘅，恰恰就是基督的相反、倒轉和錯置。我的講章是否很難明白呢？有朋友來信說很深，不明白，願上主聖靈補充我的不足。願榮耀歸上主榮光歸香港，誠心所願。