សាខាកាកបាទក្រហមកម្ពុជា ខេត្ត​ ​នាំយកអំណោយផ្ដល់ជូនពលរដ្ឋអ្នកផ្ទុកមេរោគអេដស៍ក្នុងស្រុកអង្គរជុំ скачать в хорошем качестве

សាខាកាកបាទក្រហមកម្ពុជា ខេត្ត​ ​នាំយកអំណោយផ្ដល់ជូនពលរដ្ឋអ្នកផ្ទុកមេរោគអេដស៍ក្នុងស្រុកអង្គរជុំ

សាខាកាកបាទក្រហមកម្ពុជា ខេត្តសៀមរាប ចុះសួរសុខទុក្ខ និងនាំយកអំណោយផ្ដល់ជូនពលរដ្ឋអ្នកផ្ទុកមេរោគអេដស៍ក្នុងស្រុកអង្គរជុំ នៅព្រឹកថ្ងៃទី១១ ខែមីនា ឆ្នាំ២០២៦នេះ ឯកឧត្តម ក្រុស សារ៉ាត់ សមាជិកគណៈកម្មាធិការសាខា និងជាអនុប្រធានក្រុមការងារឥស្សរជនឆ្នើមថ្នាក់ជាតិកាកបាទក្រហមកម្ពុជាខេត្តសៀមរាប តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ ប្រធានគណៈកម្មាធិការសាខា បានអញ្ជើញចុះសួរសុខទុក្ខ និងនាំយកអំណោយមនុស្សធម៌ជូនដល់អ្នកផ្ទុកមេរោគអេដស៍ងាយរងគ្រោះបំផុតចំនួន ១០នាក់ មកពី៣ឃុំក្នុងស្រុកអង្គរជុំ ខេត្តសៀមរាប។ ក្នុងឱកាសនោះ ឯកឧត្តម ក្រុស សារ៉ាត់ បាននាំការផ្ដាំផ្ញើសួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ ក៏ដូចជា ឯកឧត្តម ប្រាក់ សោភ័ណ ប្រធានក្រុមការងារឥស្សរជនឆ្នើមថ្នាក់ជាតិសាខាខេត្តសៀមរាប ដែលលោកតែងតែយកចិត្តទុកដាក់គិតគូរពីសុខទុក្ខ និងសុខភាព បងប្អូនប្រជាពលរដ្ឋក្រីក្រ ពិសេសបងប្អូនអ្នកផ្ទុកមេរោគអេដស៍ និងអ្នកជំងឺអេដស៍។ ឯកឧត្តម ក្រុស សារ៉ាត់ ក៏លើកទឹកចិត្ត និងកោតសរសើរចំពោះការអនុវត្តយ៉ាងខ្ជាប់ខ្ជួនតាមក្បួនវេជ្ជសាស្ត្រដែលមានភាពទំនើប និងជឿនលឿន តាមរយៈការលេបថ្នាំ (ផ្ដល់ជូនឥតគិតថ្លៃ) តាមកំណត់របស់គ្រូពេទ្យ ហេតុនេះនាំឱ្យឆាប់ជាសះស្បើយ។ ឯកឧត្ដមសំណូមពរដល់បងប្អូនដែលផ្ទុកមេរោគអេដស៍ឱ្យលេបថ្នាំឱ្យបានទៀតទាត់ ទាន់ពេលវេលា និងការកំណត់ ជាពិសេសទៅជួបក្រុមគ្រូពេទ្យជំនាញ តាមការណាត់របស់គ្រូពេទ្យ ហើយប្រសិនបើមិនស្រួលខ្លួនសូមប្រញាប់ទៅជួបគ្រូពេទ្យដែលនៅជិតផ្ទះជាបន្ទាន់។ សូមបញ្ជាក់ថា អំណោយមនុស្សធម៌ដែលផ្ដល់ជូនក្នុងម្នាក់ទទួលបាន៖ អង្ករ ២៥គីឡូក្រាម, ភួយ១, មុង១, សារុង១, ក្រមា១, មី ១កេស, ទឹកត្រី ១យួរ, អំបិល ១គីឡូក្រាម, និងថវិកាមួយចំនួនផងដែរ៕ អត្ថបទ និងរូបភាព៖ លោក អ៊ុន ណារាជ្យ