መልክአ ቊርባን በዕዝል 111 скачать в хорошем качестве

መልክአ ቊርባን በዕዝል 111

መልክአ ቊርባን ሰላም ለኪ እንዘ ንሰግድ ንብለኪ፤ ማርያም እምነ ናስተበቊዐኪ፤ እምዓርዌ ነዓዊ ተማሕፀነ ብኪ፤ በእንተ ሐና እምኪ ወኢያቄም አቡኪ፤ ማኅበረነ ዮም ድንግል ባርኪ። ሰላም ሰላም ለመልክአ ሐና ወኢያቄም፤ ዘወለድዋ በርስዐኖሙ ለቡርክት ማርያም፤ እትመሐፀን አንሰ በመልክኦሙ ፍጹም፤ ወእትዓተብ መልክእየ በእደ ማርያም፤ ዘመነ ፍሥሐ ለይኵን በእራኃ ግሩም፤ ለዓለመ ዓለም ወዓዲ በሰላም። አማሕፀነ ድንግል ሥጋኪ ንጹሐ በዘለብሶ፤ በይነ ኪዳንኪ ዘኢይትሔሶ፤ መፍቀሬ አምላክ ገብርኪ ዘአወፈየኪ ንግሦ፤ ታግርሪ ፀሮ ወታጽንዒ አትሮንሶ፤ ወሀበኪ ምዕቅብና ሥጋሁ ወነፍሶ። ናዛዚትነ እምኀዘን ወኃይለ ውርዙትነ እምርስዐን፤ በማሕፀንኪ ተፀውረ ብሉየ መዋዕለ ሕፃን፤ ኦ ማርያም ተስፋ ለቅቡፃን፤ በጊዜ ጸሎት ወዕጣን ወበጊዜ ቅዱስ ቊርባን፤ ለናዝዞትነ ንዒ ኀበዝ መካን። ወላዲተ አምላክ ማርያም እንበለ ሰብሳብ ወሩካቤ፤ በይነ ዘአቅረብኩ ለኪ ንስቲተ ቃለ ይባቤ፤ ፈትቲ እሙ በረከተ አፉኪ መዓዛ ከርቤ፤ ለነዳይ ብእሲ ወለዘረከቦ ምንዳቤ፤ ኅብስተከ ፈትት ኢሳይያስ ይቤ። በላዒ ውእቱ ዘይበልዕ ዓማፅያነ፤ ወእሳት ነዳዲ ዘያውዒ ኃጥአነ፤ ኅብስተ ቊርባን ዝንቱ እስመ ሥጋ አማኑኤል ኮነ፤ ለጻድቃን ባሕቱ ይከውኖሙ መድኅነ፤ ከመ ኢይርአዩ ኵነኔ ወደይነ። ይወርድ መንፈስ ቅዱስ በላዕለ ኅብስቱ ወወይኑ፤ ሶበ ይብል ካህን ጸጋ መንፈስ ቅዱስ ፈኑ፤ ማዕከለ ዛቲ ቅድስት ቤተ ክርስቲያኑ፤ ይዌልጦሙ በቅጽበት አባላተ ክርስቶስ ይኩኑ፤ በኃይለ ጥበቡ መንክር ወዕፁብ ኪኑ። ሰላም ለክሙ ጻድቃን ወሰማዕት፤ እለ አዕረፍክሙ በሃይማኖት፤ መዋዕያነ ዓለም አንትሙ በብዙኅ ትዕግሥት፤ ሰአሉ ቅድመ ፈጣሪ በኵሉ ሰዓት፤ እንበለ ንስሐ ኪያነ ኢይንሣእ ሞት። ሰላም ለክሙ ጻድቃን በዛቲ ዕለት ኵልክሙ፤ እድ ወአንስት በበአስማቲክሙ፤ ቅዱሳነ ሰማይ ወምድር ማኅበረ ሥላሴ አንትሙ፤ ዝክሩነ በጸሎትክሙ በእንተ ማርያም እሙ፤ ተማሕፀነ ለክርስቶስ በሥጋሁ ወደሙ። እግዚኦ ኵነኔከ ሀቦ ለንጉሥ፤ ጽድቀከኒ ለወልደ ንጉሥ፤ አግርር ፀሮ ታሕተ እገሪሁ፤ ዕቀብ ሕዝቦ ወሠራዊቶ ለንጉሥነ መፍቀሬ አምላክ። እግዚኦ መሐረነ ክርስቶስ (ሦስት ጊዜ) በእንተ ማርያም መሐረነ ክርስቶስ (ሦስት ጊዜ) ሰአሊ ለነ ማርያም ወልድኪ ሣህሎ ይክፍለነ። ድኅረ ቊርባን እንዘ ብዙኃን ንሕነ እምፆታ ዘመን ዘዚአሁ፤ ነአምን ሞቶ ወንሴፎ ትንሣኤሁ፤ ለእግዚእ ክርስቶስ ዘኢይትአተት ጸጋሁ፤ መለያልየ አሐደ ይረስየነ ምስሌሁ፤ በአጽናፈ ዓለም ይጠባሕ አሐዱ ሥጋሁ። ኦ ክርስቶስ በግዐ መሥዋዕት አሐዱ፤ ካህነ ወንጌል ሥጋከ ለለጊዜ ይጠባሕ በፈቃዱ፤ ለተዝካረ ሞትከ ባሕር ዘልበ ምእመናን ምእላዱ፤ ነፋሰ ጥዒና መንፈሳዊ ሶበ ይነፍሕ በዐውዱ፤ ከመ ነበልባል ይትነሣእ ሞገዱ። ጊዜ ይሠዋዕ ኅብስተ ሥጋከ እመልክአ ሥጋ ፍሉጥ፤ ወደምከ ወይን እምደመ ጠባይዕ ውሉጥ፤ መሥዋዕተ መድኃኒት ክርስቶስ ለሥርየተ ኃጢአት ሥሉጥ፤ ንሕነሰ በዐይነ ሃይማኖት ምሡጥ፤ ፍጹመ ሥጋዌከ ንሬኢ እምውስጥ። አብርሃም ተመነየ ተፈሥሐ ወተነበየ፤ ምሥጢረ ሞትከ ክርስቶስ አመ በበግዕ ርእየ፤ ብፁዓን ንሕነ እምኔሁ ዘአፈድፈድነ ዕበየ፤ እስመ ንሠውዐከ ለለዕለቱ ወንጠብሐከ ዝየ፤ ወበደምከ ነሐጽብ ጌጋየ። በመንፈቀ ሳብዕ ወርኅ በዓለ መጸለት ይገብሩ፤ ተድላ ንብረቶሙ በገዳም እንዘ እስራኤል ይዜከሩ፤ ንሕነሰ ክርስቶስ ንዜከር ለለአሚሩ፤ ፍጹመ ኂሩተከ ዘኅቱም ምሥጢሩ፤ ወግብረ ሞትከ ዘዕፁብ ነገሩ። ናሁ ማዕከሌነ ወማዕከሌከ ሥዩም፤ ትእምርተ መሐላ ሥጋከ ወቀስተ ኪዳንከ ደም፤ ኢየሱስ ክርስቶስ መሥዋዕተ ሰላም፤ በከመ ተገብረ ቀስተ ደመና አመ ተአይኅ ዓለም፤ ዝናመ ጌጋይነ ይዕጹ ጥብሕከ ልጓም። ደቂቀ እስራኤል ቅድመ በንስከተ ዓርዌ እለ ደወዩ፤ በርእየተ ዓርዌ ዘብርት እምነ ሕማሞሙ ጥዕዩ፤ ንሕነሰ ለክርስቶስ ሱቱፋነ ደሙ ወማዩ፤ ኢነሐምም በዓለም ከመ ኢሐመ ባሕርዩ፤ ወለእመ ነሥአነ ሞት ዳግመ ነሐዩ። ግነዩ ለእግዚአብሔር ወጸውዑ ስሞ፤ እንዘ ኢትፈልጡ እሞ፤ ምእመናን ወትረ በኢያርምሞ፤ ተዘኪረክሙ በመልዕልተ መስቀል ቀዊሞ፤ በእንቲአነ ዘከዐወ ደሞ። ግነዩ ለግዚአብሔር እስመ ለዓለም ምሕረቱ፤ ዐቢይ ኃይሉ ወብዙኅ አኰቴቱ፤ እምልብክሙ በቀለ እንዘ ታአትቱ፤ ከመ ይሥረይ አበሳክሙ ሰአልዎ ሎቱ፤ እስመ መሐሪ አምላክ ወጻድቅ ባሕቲቱ። ግነዩ ለእግዚአብሔር ወኀበ ማርያም ሰአሉ፤ እንተ ይእቲ ንጽሕት ሥጋ አባሉ፤ ሕሊናክሙ ሰማየ እንዘ ታሌዕሉ፤ ከመ ትትባልሑ እምግባረ እከይ ኵሉ፤ መሐረነ አምላክነ ወአቡነ በሉ።