திருவீழிமிழலை / சடையார் புனல் உடையான் / திருஞானசம்பந்தர் தேவாரம் / скачать в хорошем качестве

திருவீழிமிழலை / சடையார் புனல் உடையான் / திருஞானசம்பந்தர் தேவாரம் /

01.011 திருவீழிமிழலை | சடையார் புனல் உடையான் ஒரு சரி கோவணம் உடையான் | திருஞானசம்பந்தர் தேவாரம் #NethrarpaneswararTemple | #Thiruveezhimizhalai | #Thirugnanasambandhar | #Thevaaram | #NalamTharumThirumuraiPathigam தேவார மூவராலும் பாடல் பெற்ற தலங்கள் பல உண்டு. அவற்றில் திருவீழிமிழலை தலமும் ஒன்றாகும். இத்தலம் 23 திருப்பதிகங்களை உடையது. வீழிச்செடிகள் நிறைந்திருந்ததால் இவ்வூருக்கு திருவீழிமிழலை என்று பெயர் ஏற்பட்டது. இத்தலத்தின் தல விருட்சம் வீழிமரம். மஹாவிஷ்னுவின் கையில் இருந்த சக்கராயுதம் தேய்ந்து போனபோது, ஆற்றல் பொருந்திய சக்கரம் பெறுவதற்காக மஹாவிஷ்னு சிவபெருமானை பூஜித்ததாக பல்வேறு புராணத் தகவல்கள் உண்டு. அப்படி சிவபெருமானை விஷ்னு பூஜித்ததாக திருமாற்பேறு, திருப்பைஞ்ஞீலி, திருவீழிமிழலை ஆகிய சிவஸ்தலங்களின் தலபுராண வரலாறுகள் கூறுகின்றன. இம்மூன்று தலங்களில் திருவீழிமிழலை மிகவும் முக்கியமானதாக கருதப்படுகிறது. திருமாலுக்கு சலந்திரனைச் சம்ஹரிக்கச் சக்கரம் தேவைப்படுகிறது. அதைப் பெருவதற்காக திருவீழிமிழலையில் சிவபெருமானிடம் வருகிறார். ஆயிரம் தாமரை மலர்களால் சிவனை அர்ச்சித்தால் எண்ணியது கிடைக்கும் என்று அறிகிறார். அதன்படி ஆயிரம் தாமரை மலர்கள் சேர்த்து அர்ச்சனை செய்ய ஆரம்பித்து 999 மலர்களால் அர்ச்சனை செய்து விடுகிறார். ஆயிரமாவது மலர் இல்லை. இன்னொரு தாமரை மலரைக் கொண்டு வந்து அர்ச்சனையை தொடர நேரமும் இல்லை. குறைந்த ஒரு மலருக்குப் பதிலாக தாமரை மலருக்கு ஒப்பான தனது இரு கண்களில் ஒன்றையே பெயர்த்து எடுத்து பூஜையை குறை இல்லாமல் முடித்தவுடன் சிவனும் காட்சி கொடுத்து திருமால் விரும்பியபடி அவருக்கு சக்கராயுதம் கொடுத்து அருள் செய்கிறார். இப்படி மஹாவிஷ்னு தன் கண்ணையே கொடுத்து சிவனை அர்ச்சித்த தலம் தான் திருவீழிமிழலை. இறைவர் திருப்பெயர் : ஸ்ரீ நேத்திரார்ப்பணேசுவரர் இறைவியார் திருப்பெயர் : ஸ்ரீ சுந்தர குஜாம்பிகை திரும்பாம்புரம் என்னும் தலத்தை வணங்கிக்கொண்டு பிள்ளையார் திருவீழிமிழலைக்கு அப்பருடன் எழுந்தருள அந்தணர்கள் எதிர்கொண்டு அழைத்தார்கள். பிள்ளையார் அந்தணர்கள் புடைசூழ விண்ணிழிந்த கோயிலை வலங்கொண்டார், வியந்தார். கீழே விழுந்து வணங்கினார். உள்ளத்தில் உணர்ச்சி பொங்கி வழிந்தது. இசை ஆயிற்று "சடையார் புனல் உடையான்" என்றெடுத்துச் சந்த இசைத்தமிழைச் சாற்றி மணவாளப் பெருமானது திருவடிக்கீழ் ஆனந்த வெள்ளத்தாடினார். இத்திருப்பதிகத்தின் பத்துப் பாடல்கள், பல்வகைப் பெருமைகளையும் உடைய சிவபிரான் எழுந்தருளியுள்ள இடம் திருவீழிமிழலை என்கின்றது. சடையார் புனல் உடையான் ஒரு சரி கோவணம் உடையான் படையார் மழு உடையான் பல பூதப்படை உடையான் மடமான் விழி உமைமாது இடம் உடையான் எனை உடையான் விடையார் கொடி உடையான் இடம் வீழிம்மிழலையே. ..... (01) ஈறாய் முதல் ஒன்றாய் இரு பெண் ஆண் குணம் மூன்றாய் மாறா மறை நான்காய் வரு பூதம் அவை ஐந்தாய் ஆறார் சுவை ஏழ் ஓசையொடு எட்டுத்திசை தானாய் வேறாய் உடன் ஆனான் இடம் வீழிம்மிழலையே. ..... (02) வம்மின் அடியீர் நாண்மலர் இட்டுத் தொழுது உய்ய உம் அன்பினொடு எம் அன்பு செய்து ஈசன் உறை கோயில் மும்மென்று இசை முரல் வண்டுகள் கெண்டித் திசை எங்கும் விம்மும் பொழில் சூழ் தண்வயல் வீழிம்மிழலையே. ..... (03) பண்ணும் பதம் ஏழும் பல ஓசைத் தமிழ் அவையும் உள் நின்றது ஒரு சுவையும் உறு தாளத்து ஒலி பலவும் மண்ணும் புனல் உயிரும் வரு காற்றும் சுடர் மூன்றும் விண்ணும் முழுது ஆனான் இடம் வீழிம்மிழலையே. ..... (04) ஆயாதன சமயம் பல அறியாதவன் நெறியின் தாய் ஆனவன் உயிர்கட்கு முன் தலை ஆனவன் மறை முத் தீ ஆனவன் சிவன் எம்இறை செல்வத் திருஆரூர் மேயான் அவன் உறையும் இடம் வீழிம்மிழலையே. ..... (05) கல்லால் நிழல் கீழாய் இடர் காவாய் என வானோர் எல்லாம் ஒரு தேராய் அயன் மறை பூட்டி நின்று உய்ப்ப வல்வாய் எரி காற்று ஈர்க்கு அரி கோல் வாசுகி நாண் கல் வில்லால் எயில் எய்தான் இடம் வீழிம்மிழலையே. ..... (06) கரத்தான் மலி சிரத்தான் கரி உரித்து ஆயதொர் படத்தான் புரத்தார் பொடிபட தன் அடி பணி மூவர்கட்கு ஓவா வரத்தான் மிக அளித்தான் இடம் வளர் புன்னை முத்து அரும்பி விரைத்தாது பொன் மணி ஈன்று அணி வீழிம்மிழலையே. ..... (07) முன் நிற்பவர் இல்லா முரண் அரக்கன் வடகயிலை தன்னைப் பிடித்து எடுத்தான் முடி தடந்தோள் இற ஊன்றிப் பின்னைப் பணிந்து ஏத்த பெருவாள் பேரொடும் கொடுத்த மின்னின் பொலி சடையான் இடம் வீழிம்மிழலையே. ..... (08) பண்டு ஏழ் உலகு உண்டான் அவை கண்டானும் முன் அறியா ஒண் தீ உரு ஆனான் உறைகோயில் நிறை பொய்கை வண் தாமரை மலர்மேல் மட அன்னம் நடை பயில வெண் தாமரை செந்தாது உதிர் வீழிம்மிழலையே. ..... (09) மசங்கற் சமண் மண்டைக் கையர் குண்டக் குணம் இலிகள் இசங்கும் பிறப்பு அறுத்தான் இடம் இருந்தேன் களித்து இரைத்து பசும் பொற்கிளி களி மஞ்ஞைகள் ஒளி கொண்டு எழு பகலோன் விசும்பைப் பொலிவிக்கும் பொழில் வீழிம்மிழலையே. ..... (10) வீழிம்மிழலை மேவிய விகிர்தன்தனை விரைசேர் காழிந்நகர் கலை ஞானசம்பந்தன் தமிழ் பத்தும் யாழின் இசை வல்லார் சொலக் கேட்டார் அவர் எல்லாம் ஊழின் மலி வினை போயிட உயர்வான் அடைவாரே. ..... (11) பதிகப் பலன் : வீழிமிழலையுள் எழுந்தருளிய விகிர்தனாகிய இறைவனைப் பற்றி மணம் பொருந்திய சீகாழிப் பதியில் தோன்றிய கலைவல்ல ஞானசம்பந்தன் பாடியருளிய பாடல்கள் பத்தினையும் யாழிசையில் பாட வல்லார்களும் சொல்லக் கேட்டார்களும் ஆகிய அனைவரும் ஊழாக அமைந்த வினைகள் நீங்கச் சிவப்பேறு எய்துவர். ஆலய முகவரி : அருள்மிகு நேத்ரார்ப்பணேஸ்வரர் திருக்கோயில், திருவீழிமிழலை, திருவீழிமிழலை அஞ்சல், குடவாசல் வட்டம், திருவாரூர் மாவட்டம், PIN - 609 505. குறிப்பு : இப்பதிகத்திற்கான சொற்பிரிவு எங்களது முயற்சியில் உருவாக்கப்பட்டுள்ளது. பிழை இருப்பின் எங்களுக்கு தெரியப்படுத்தலாம். Subscribe Us :    / @nalamtharumthirumuraipathigam   "மேன்மைகொள் சைவநீதி விளங்குக உலகம் எல்லாம்"